Weyermoor () is en lütt Dörp in de Gemeen Worpsweed in’n Landkreis Oosterholt, Neddersassen. Binnen de Gemeen höört de Oort to de polietsche Oortschop Worpsweed.

Geografie

De Oort liggt in dat Düvelsmoor in’n Westen von’n Weyerbarg. Dat Water ut dat Rebeed flütt över Gravens na de Hamm hen af. En Stück in’n Westen münnt de Semkenfohrt in de Hamm.

De Naveröörd sünd dat Dörp Düvelsmoor in’n Noorden, Weyerdelen un Worpsweed in’n Noordoosten, Wörpdaal in’n Süüdoosten, Waakhusen in’n Süüdwesten un Neenfeld un Olenbrügg in’n Noordwesten.

Historie

Weyermoor is in dat 18. Johrhunnert as Moorkolonie anleggt worrn. De Oort is toeerst ok Worpswedermoor nöömt worrn.

In’n Eersten Weltkrieg sünd veer Soldaten ut Weyermoor fullen oder vermisst un in’n Tweten Weltkrieg dree.Onlineprojekt Gefallenendenkmäler

Verwaltungsgeschicht

In de Franzosentied hett de Oort toeerst 1810 bet 1811 binnen dat Königriek Westfalen to de Mairie Worpsweed in’n Kanton Leendaal höört un denn von 1811 bet 1814 to dat Franzöösche Kaiserriek ünner Napoleon un dor ok wedder to de Mairie Worpsweed in’n Kanton Leendaal.

De Oort hett vör 1852 to de Vaagdie Worpsweed von dat Amt Oosterholt tohöört un denn von 1852 bet 1885 to dat Amt Leendaal. Na 1885 weer dat in’n Kreis Oosterholt, de 1932 mit’n Kreis Blomendal to’n ne’en grötteren Kreis Oosterholt tohoopgahn is.

De Oort weer fröher en egenstännige Gemeen. Düsse Gemeen is an’n 1. April 1929 mit Wörpdaal, Noordweed, Süüdweed un Worpheim to de ne’e Gemeen Worpheim tohoopleggt worrn. Düsse Gemeen hett denn blots bet to’n 1. Oktober 1936 bestahn, as de Gemeen Worpheim Deel von de Gemeen Worpsweed worrn is. De Gemeen Worpsweed is mit de Gemeenreform in Neddersassen an’n 1. März 1974 noch wedder grötter worrn. Siet 1974 is Weyermoor binnen de Gemeen Worpsweed Deel von de Oortschop Worpsweed, de en egen Oortsvörsteiher hett.

Inwahnertall

Religion

Weyermoor is evangeelsch-luthersch präägt un höört to dat Kaspel von de Zion-Kark in Worpsweed.

För de Kathoolschen gifft dat in Worpsweed de Maria-Freden-Kapell, de to de Goden-Hirt-Kark in Leendaal höört. De Goden-Hirt-Kark höört siet 1. September 2012 to de Karkengemeen von de Hillige-Familie-Kark in Oosterholt-Scharmbeek.

Kultur

Gedenktafeln för de Fullenen ut de twee Weltkrieg’ hängt in Worpsweed in de Kark.

Weertschop un Infrastruktur

Verkehr

Nich wied af von Weyermoor langs löppt de Kreisstraat 11, de in’n Noordoosten in Worpsweed in de Landsstraat 153 münnt un in’n Süüdwesten över Waakhusen un Viehland na de K 9 bi Oosterholt-Scharmbeek un Hu’e löppt. De L 153 föhrt von Worpsweed in’n Noorden na Huttenbusch un in’n Süden na Leendaal.

De nächste Autobahn is de Autobahn 27 (Afsnidd Bremerhoben–Bremen). De Opfohrt 17 Bremen-Industriehavens liggt so 16 Kilometer in’n Süüdwesten von Weyermoor an de Hu’er Heerstraat.

De nächste Bahnhoff is so bi ölven Kilometer wied weg in’n Westen de Bahnhoff Oosterholt-Scharmbeek an de Bahnlien Bremen–Bremerhoben. Von 1911 bet 1978 hett dat ok Personenverkehr op de Bahnlien Stood–Oosterholt-Scharmbeek geven. De Oort harr in disse Tied en egen Bahnhoff.

Scholen

Bet 1853 harr Weyermoor en egen lüttje Volksschool. In dat Johr hett Weyermoor mit Noordweed, Wörpdaal un Delen von Waakhusen un Worpsweed en Schoolverband grünnt. De ne’e School stünn denn in Wörpdaal. Düsse School hett bet Oostern 1956 bestahn.

Footnoten

Kategorie:Oort Kategorie:Landkreis Oosterholt