mini|Gabriel in dat Johr 2011 mini|Peter Gabriel 2004 bi en Konzert mit Tony Levin (links) un David Rhodes (rechts)
Peter Brian Gabriel (* 13. Februar 1950 in Chobham, Surrey Heath) is en britisch Musiker un Video-Künstler. Bekannt wurr he in de fröh 1970er Johren as Frontmann un Grünnensliddmaat vun den dormalige Progressive-Rock-Band Genesis.
Nah sien Weggang vun Genesis in' Harvst 1975 hett he en spoodriek Solokarriere anfungen. De Swoorpunkt leeg up de Produktschoon un Fördern vun Weltmusik, sowohl sien eegen Musik aber ok de vun anner Künstler bedrapend. Todem nehm he en Vörriederull in den Beriek vun de digital bearbeit Musik in. Sien Musik, en nich klar intoordnen Mischung ut Pop un Rock mit progressiven Elementen un düütlich Inflooten vun de Weltmusik, stell he upwännig in spektakulär Videos un konzeptschonell anleggt Liveshows dar.
Peter Gabriel sett sück för Minschenrechte in, ünner annern bi Amnesty International un de vun hüm mitgrünnd Minschenrechtsorganisatschoon Witness.Peter Gabriel: Profile on TED.com, 29. Juli 2009, vun ted.com (engelsch)
1967–1975: Genesis mini|Gabriel as „Britannia“ (Dancing With The Moonlit Knight), 1974
1967 hett Gabriel wiels sien Schooltiet an de Charterhouse School mit sien Mitschölern Tony Banks, Anthony Phillips, Mike Rutherford un Slagtüüchspeler Chris Stewart de Band Genesis grünnd. De Bandnaam weer en Vörslag vun Jonathan King, de dat eerste Album From Genesis to Revelation produzeert hett. As Singer funn Gabriel Inspiratschoon bi Nina Simone un Otis Redding.
Dör de wenig begäng Bühnenpräsenz vun Gabriel kreeg de Band groot Upsehn in de internatschonale Musikszene. He is in tallriek bizarren Kostümen uptreeden un hett de Songs mit sarkastischen, dröömoordigen Geschichten inleit. To sien bekanntst Verkleedungen tellen „The Flower“ un „Magog“ (Supper’s Ready), „Britannia“ (Dancing With The Moonlit Knight), „The Old Man“ (The Musical Box) un „Rael“ as ok „The Slipperman“ för dat Konzeptalbum The Lamb Lies Down on Broadway. To de dormalig Besetten vun Genesis hörrn neben den Bassisten un Gitarristen Mike Rutherford as ok den Keyboarder Tony Banks de Gitarrist Steve Hackett un de Slagtüüchspeler Phil Collins, de 1975 nah den Utstieg vun Gabriel de sien Posten as Frontmann övernehm. Wiels sück de Band mit dat Album The Lamb Lies Down On Broadway up Welttournee befunn, hett sück Gabriel entslooten, de Band nah dat letzt Konzert to verlaaten. Sien Entscheeden wurr ünner annern dör musikalische Differenzen mit sien Mitmusikern un de problematisch verloopen Gebort vun sien Dochter Anna beinfloot. De Trennung vun de Band hett he twee Johr later mit den Song Solsbury Hill verarbeit.
1975–1976: Vörbereiten up de Solokarriere Nah sien Utstieg hett Gabriel eerst mal en Uttiet nommen un verbroch völ Tiet mit de Sülvstutforschen un dat Betrachten vun sien eegen Ween as ok dat Klaveerspeel, Yoga, den Anbau vun Gemüüs un nich toletzt mit sien Familie. 1976 nehm he ünner Mitwirken vun sien fröheren Mitstrieder Phillips, Rutherford un Collins eerste Demos för en Soloalbum up un later in't Johr fungen den de Upnahmen in de USA an.
1977–1985: Peter Gabriel I–IV 1977 keem dat schlicht „Peter Gabriel“ betitelte Debüt herut, dat vun Bob Ezrin produzeert wurr. Dat Album is en Sammelsurium vun bannig verscheeden Stile un enthollt den eersten grooten Hit vun Gabriel, Solsbury Hill. In' Grooten un Ganzen tofräe mit dat Album, hollt Gabriel den Song Here Comes The Flood nahderhen aber för överproduzeert. To Anfang hett sück Gabriel wiegert, sien Alben mit Titeln to versehn, woruphen Fans un Presse de eerst dree Alben mit den inoffiziellen Naamsgeeven Car, Scratch un Melt vunnanner ünnerscheeden. Sien veert Album, dat in England weer blots mit de Naam vun den Künstler versehn weer, wurr in den USA ünner den Titel Security herutbrocht.
För sien tweet, 1978 rutbrocht Album hett Gabriel mit den King-Crimson-Gitarristen Robert Fripp as Produzent tosommenarbeit. Dat weer wesentlich düsterer un experimenteller as sien Vörgänger un harr eenig utfielt Kompositschonen, aber kien Hit. Den Song Exposure schreev Gabriel tosommen mit Robert Fripp. 1979 hemm de beid denn för Fripp sien Album Exposure den Song Here Comes The Flood in en nee Version upnommen. Latere Versionen vun dat Stück, to finnen etwa up de düütsch Utgaav vun de Maxisingle Biko (as Jetzt kommt die Flut, 1980), up de Kompilatschoon Shaking The Tree (1990) un up de Live-DVD Growing Up van 2003, weer sporsamer instrumenteert.
mini|Gabriel in Oslo, 1978
Dat 1980 rutbrocht dart Album enthollt de Hitsingles Games Without Frontiers un Biko. Upfällig an dat Album is de gewagte Produktschoon, bi de völ wenig begäng un bahnbreekend Upnahmemethoden un Effekte insett wurrn. So wurr hier to'n eersten Mal der in de 1980er Johren anseggt Gated-Reverb-Slagtüüchsound insett, de sien Wirkung ut en mächtigen Hall mit abrupt afrieten Hallfahn betreckt. Up Wunsch vun Gabriel hen hemm de Slagtüüchspeler up dit Album kien Becken bruukt; Phil Collins speel bi den Song Intruder en eenfack Pattern, dat Gabriel un sien Toningenieur Hugh Padgham noog Ruum för Klangexperimente leet, de to den baben angeven Effekt führn deen. Later wurr disse Drumsound dör Collins sien Hitsingle In the Air Tonight weltberühmt. Doröver herut weer „Melt“, as dat Album in Anspeelen up de Covergrafik (Gabriel sien wegflooten Gesicht) ok nömmt wurr, de eerste offiziell verapenlicht Toondräger överhoopt, up den mit den Fairlight CMI ei Sampler to hören is.
För sien dart Album hett Gabriel verscheeden natschonalen Döchtern vun sien Plattenfirma anboden, dat Album komplett ok in de jewielig Landsspraak up den Markt to bringen. Aber blots de düütsche weer doran interesseert. Wegen den ünnerscheedlichen Spraakrhythmus wurr dat Album för de düütsch Version komplett nee upnommen (Text un Musik) un afmischt, dat keem denn ünner Ein deutsches Album herut. De düütsch Texte hett Horst Königstein bistüert, de ünner annern ok Leedtexte för Udo Lindenberg schreven hett.
In beschwerlichen un tietwies ergevnislos Upnahmesessions up sien ländlich Anwesen in England entstunn tüschen 1981 un 1982 dat veerte Album vun Gabriel, bi dat he sülvst neben David Lord Koproduzent weer. Up dit Wark, dat in den USA ünner de Naam Security rutbrocht wurr, hett Gabriel den Fairlight in wiet starker Maat insett as up de vörherig Produktschoon. He hett en Völtall vun sampelt Klängen mit Percussion-Elementen ut nichtwestlichen Kulturkreisen un annern wenig begäng Instrumenten bruukt, um en ümfaaten nee Klangwelt to schaffen. Trotz de eegenoordig Sound, de ungewöhnlichen Instrumente un de tomeest düsteren Texte hett sück dat Album good verköfft un harr mit dat Stück Shock The Monkey ok en Hit, to de för de dormalige Tiet in puncto Upnahmetechnik bahnbreekend Video dreiht wurr. Ok vun dit Album geev dat en düütsch Version.
To jeder vun disse veer Alben hett Gabriel Touren maakt, wobi he de ok all bi Genesis vun hüm upwändig gestalt Bühnenshow wieder utbauen dee. So hett he kunstvull Requisiten bruukt, in Kombinatschoon mit utfielt Showeinlagen, bi de he sück to'n Bispeel vun Gerüsten ut feee över de Bühne hangen leet, mit Hülp vun Spegels un Fresnel-Linsen optisch verzerren dee as ok Kostüme un Make-up droog. Bi de eerst Tourneen nehm Gabriel gelegentlich ok Genesis-Songs in dat Programm up. För en Tournee leet sück de ganze Band kahl raseeren. Wiels sienTour 1982/83, de dör dat Album Plays Live dokumenteert wurr, is Gabriel ok as Opening Act vun David Bowie uptreeden un muss sück vörsmieten laaten, dat he wegen sien komplexen Bühnenshow de Konzerte vun Bowie in den Schatten stellen dee.
1985 keem Gabriel sien Soundtrack to Alan Parker sien Film Birdy nah den glieknamigen Roman vun William Wharton herut. För dat atmosphärische, rein instrumentale Werk hett de Musiker deelwies Stücke vun sien dart un veert Album nochmal bruukt.
1986–1994: De groot Erfolge Bit dorhen vun sien meest Kritikern dörgahn wohlwullend upnommen un mit eenigen Hits dorbi, hett Gabriel dat in hüm staken Verwachten sluutend mehr as inlööst, as he 1986 mit dat Album So en bannig grooten Spood harr. Dat Wark enthull ünner annern de mit sexuellen Anspeelen gespickte Single-Utkopplung Sledgehammer, mit de he sien Ex-Kollegen vun Genesis un deren Hit Invisible Touch vun den eersten Platz vun de US-Charts verdrängen dee, dat satirische Big Time, de in' Duett mit Kate Bush insungen Ballade Don’t Give Up över Vertiefeln un Haapen angesichts vun Arbeitslosigkeit as ok dat Leevleed In Your Eyes, dat later för den Soundtrack vun den Film Teen Lover bruukt wurr.
Gabriel hett dat Album So mit den Kanadier Daniel Lanois pruduzeert, de ok för sien Arbeit mit U2 bekannt is. To Sledgehammer wurr in Tosommenarbeit mit den Speelbaas Regisseur Stephen R. Johnson en bannig upwännig Video dreiht, dat tallriek Pries bi den MTV Video Awards 1987 wunn. Dat Video hett nee Standards in de Musikindustrie sett, ebenso as dat Video to Big Time, bi dat völlig nee Animatschonen un Spezialeffekte insett wurrn.
He hett sien eegenLabel Real World Records grünnd, de sien eerste Utgaav 1989 de Soundtrack Passion för Martin Scorsese sien Film Die letzte Versuchung Christi weer. Dat Video to dat Album wurr vun Stefan Roloff maakt. Dat Wark wurrd vun Kritikern as Hööchtpunkt in in dat Schaffen vun Gabriel in den Beriek vun de Weltmusik ansehn un broch den Musiker en Grammy as ok en Golden-Globe-Nomineeren in. Todem wurr de Musik vun dat Album in dat düütsch Feernsehn gern un faken to dat Ünnermalen vun TV-Dokus över exotische Schauplätze insett.
1992 keem sien nächst Studioalbum Us herut, dat ebenfalls mit Daniel Lanois as Koproduzent upnommen wurr. Dat Album befaat sück mit de persönlichen Problemen vun Gabriel vun de letzt Johren, de Scheeden vun sien eerste Ehe un de Distanz to sien eerst Dochter. Ok to Digging In The Dirt wurr en bannig upwännig Video dreiht, dat wiest, wu Gabriel vun Würms upfreeten wurrd. Dat Stück hannelt vun en binneren Dämonen, de sück Bahn to breeken versöcht. Wedder mal wurrn mit dit Video nee Maatstaffen sett. De Bemöhen, sück sien Dochter weer nahder to kommen, hett Gabriel in dat Stück Come Talk To Me verarbeit, bi dat Sinéad O’Connor singend mitwarkt hett.
Us kunn nich ganz an den gewaltigen Spood vun So anknütten, dennoch gung Gabriel mit en wiedere utfielt Bühnenshow up Welttournee, de up en eckigen un en rund Bühne upführt wurr. Beid Bühnen weern dör en Steg verbunnen, de ünner annern mit en Boot befohren wurr. Utfallen Requisiten weern buterdem de Telefonzell bi Come Talk To Me oder de an den Kopp vun Gabriel fast maakt Gesichtskamera wiels Digging In The Dirt. En Konzertmitschnitt wurr as Secret World Live up VHS un CD, later ok up DVD, herutbrocht.
To Anfang vun de 1990er Johren hett Gabriel ok de multimediale CD-ROM Xplora herutbrocht, de aber up modern Bedrievssystemen nich mehr bruukt wurrn kann.
siet 1995: Up, de Millennium Show un anner diverse Projekte 1996 wurr de CD-ROM EVE produzeert un in dat folgen Johr herutbrocht. Veer Musikstücke vun Peter Gabriel markeeren de veer Ebenen vun dat Speel: Mud, The Garden, Profit, Art and Nature.
Frö de Millennium Show, de 2000 in London upführt wurr, entwickel Gabriel de musikalische Ünnermalen mit den Titel OVO. 2002 keem sien Soundtrack Long Walk Home för den austraalschen Film Rabbit-Proof Fence (dt. Feernsehtitel: „Der lange Weg nach Hause“). Ok för disse Filmmusik kreeg he en Golden-Globe-Nomineeren.
Teihn Johr nah Us keem in' September 2002 sien bither längst Studioalbum Up herut, dat vun Gabriel gröttstendeels sülvst produzeert wurr un klanglich an den ehrder unkommerziellen düsteren Sound vun de eerst Gabriel-Alben ut de 1970er un 1980er Johren erinnert. Dat wiest ok Gabriel sien kompositorschen Freeruum in dat Arrangement vun de Stücke, de bit up de Pianoballade The Drop nich kört as söss Minüüt sünd. De meest Stücke sünd nich linear konzipeert un dörloopen musikalisch as thematisch bannig dynamische Parts.