Övelgünn () is en lütt Dörp in de Gemeen Hu’e in’n Landkreis Oosterholt, Neddersassen. Binnen de Gemeen höört dat Rebeed to’n Oortsdeel Werschenreeg.

Dichter bi is aver de Oort Scharmbeekstotel in de Gemeen Oosterholt-Scharmbeek, mit den Övelgünn tohoopwussen is.

Geografie

De Oort liggt op de Oosterholter Geest. In’n Süüdwesten liggt dat Naturschuulrebeed Heerweger Moor un Born von de Hu’er Beek.

De Naveröörd sünd Buschhusen un Vörscharmbeekstotel in’n Noordoosten, Scharmbeekstotel in’n Oosten, Hu’e in’n Süden un Wullbrandt, Leessemstotel un Loog in’n Westen.

Historie

Verwaltungsgeschicht

In de Franzosentied hett de Oort toeerst 1810 bet 1811 binnen dat Königriek Westfalen to de Mairie Werschenreeg in’n Kanton Hu’e höört un denn von 1811 bet 1814 to dat Franzöösche Kaiserriek ünner Napoleon un dor to de Mairie Hu’e in’n Kanton Oosterholt.

De Oort hett bet 1848 to dat Gericht Hu’e höört. Düt Gericht is 1848 Deel von dat Amt Oosterholt worrn, ut dat 1885 wedder de Kreis Oosterholt worrn is. De Kreis Oosterholt hett sik 1932 mit’n Kreis Blomendal to’n hüdigen Kreis Oosterholt tohoopslaten.

De Oort weer fröher en egen Gemeen, is aver 1928/1929 mit de Gemeen Werschenreeg tohoopleggt worrn. An’n 1. März 1974 is de Gemeen Werschenreeg mit de Gemeenreform in Neddersassen Deel von de Gemeen Hu’e worrn.

Inwahnertall

Religion

Övelgünn is evangeelsch-luthersch präägt un höört to de To’n-Hilligen-Krüüz-Kark in Werschenreeg. Bevör düsse Kark 1966 trech worrn is, hett de Oort to de Martin-Kark in Leessem höört.

För de Kathoolschen is de Hillige-Familie-Kark in Oosterholt-Scharmbeek tostännig.

Weertschop un Infrastruktur

För Övelgünn is de freewillige Füürwehr Leessemstotel-Werschenreeg mit tostännig.

Verkehr

Dör Övelgünn löppt de Kreisstraat 3, de in’n Westen över Leessemstotel un Werschenreeg na Stendörp an de Landsstraat 135 ran geiht un in’n Oosten in Scharmbeekstotel an de Bundsstraat 74. In’n Noorden geiht von de K 3 de K 17 af, de in’n Noorden na de L 149 bi Heilshoorn föhrt. De B 74 föhrt in’n Noordoosten na Oosterholt-Scharmbeek, Hambargen, Gnarrenborg un Bremervöör un in’n Süüdwesten över Hu’e na Bremen-Noord.

De nächste Autobahn is de Autobahn 27 (Afsnidd Bremen–Bremerhoben). De Opfohrt 15 Ihlpohl liggt so fiev Kilometer in’n Süüdwesten von Övelgünn an de L 135. Ok de Opfohrt 16 Bremen-Noord op de A 27/A 270 liggt jüstso wied in’n Süüdwesten.

De nächste Bahnhoff is so bi dree Kilometer wied weg in’n Süden de Bahnhoff Hu’e an de Bahnlien Bremen–Bremerhoben.

Footnoten

Kategorie:Oort Kategorie:Landkreis Oosterholt