De Grummenstreek () is en lütten Oort in de Gemeen Achem in’n Landkreis Veern, Neddersassen. Binnen de Gemeen höört de Oort to de polietsche Oortschop Bollen. De Oort liggt direkt an de Landsgrenz na Bremen.

De Oort bestünn fröher ut twee Hööv, von de de een to dat Dörp Mahndörp un de annere to dat Dörp Bollen tohöört hett. De beiden Hööv sünd dorüm ok Mahndörper Grummenstreek un Boller Grummenstreek nöömt worrn.

Geografie

De Oort liggt butendieks in de Masch direkt an de Werser.

De Naveröörd sünd Arbargen in’n Noorden, Mahndörp un Uphusen in’n Noordoosten, Bollen in’n Oosten, Bolleresch un Bollerholt in’n Süüdoosten, Ausen in’n Süden, Suudweyh un Karkweyh in’n Süüdwesten, Drey in’n Westen un Hemeln in’n Noordwesten. Hemeln, Arbargen un Mahndörp höört dorbi to de Stadt Bremen.

Historie

De Grummenstreek is en fröheren Warder in de Werser, de vondaag aver wedder kumplett mit dat Över verbunnen is.

Vondaag gifft dat dor en Restaurant mit Campingplatz. Dat Restaurant hett bet 2009 Osmers Sommergarten heten un siet 2010 Deichkind.

Verwaltungsgeschicht

In de Franzosentied von 1810 bet 1814 hett de Oort to de Mairie Arbargen in’n Kanton Achem höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort hett vör 1852 to de Westvaagdie von dat Gogericht Achem tohöört, dat 1852 denn to dat Amt Achem worrn is. Na 1885 weer dat in’n Kreis Achem. 1932 is de Kreis Achem mit’n Kreis Veern tohoopgahn un hett den ne’en un grötteren Kreis Veern billt.

De Oort weer fröher opdeelt twüschen de Gemenen Mahndörp un Bollen. In dat 20. Johrhunnert is de Mahndörper Grummenstreek denn ok Deel von de Gemeen Bollen worrn. An’n 1. Juli 1972 mit de Gemeenreform in Neddersassen is de Gemeen Bollen Deel von de Gemeen Achem worrn.

Inwahnertall

tohoop:

Bollen:

Mahndörp:

Religion

De Grummenstreek is evangeelsch-luthersch präägt un höört to dat Kaspel von de Nikolai-Kark in Mahndörp. De Kark is 1965 boot worrn. Vörher hett de Oort bet 1890 to dat Kaspel von de Johannis-Kark in Arbargen un von 1890 bet 1965 to dat Kaspel von de Kark in Hemeln höört.

För de Kathoolschen is de St.-Matthias-Kark in Achem tostännig.

Weertschop un Infrastruktur

För’n Grummenstreek is de freewillige Füürwehr Uphusen mit tostännig.

De Weserradweg löppt dör’n Grummenstreek dör.

Verkehr

De eenzige Straat von’n Grummenstreek weg löppt in’n Oosten na Bollen un dor denn över de Kreisstraat 1 in’n Noorden na Mahndörp an de Mahndörper Heerstraat. Düsse Straat föhrt in’n Süüdwesten as Landsstraat 158 över Uphusen un Bieren na Achem, Langwedel un Veern. In’n Noordwesten geiht de Mahndörper Heerstraat na Hemeln un is von dor an de Binnenstadt von Bremen anslaten.

De nächste Autobahn is de Autobahn 1 (Afsnidd Bremen–Wasra). De Opfohrt 54 Uphusen/Mahndörp liggt so fiev Kilometer in’n Noordoosten von’n Grummenstreek an de L 158.

De nächste Bahnhoff is so bi fiev Kilometer wied weg in’n Noordoosten de Bahnhoff Mahndörp an de Bahnlien Wunsdörp–Bremen.

Footnoten

Kategorie:Oort Kategorie:Landkreis Veern