Ollendörp () is en Dörp in de Gemeen Holste (Samtgemeen Hambargen) in’n Landkreis Oosterholt, Neddersassen.

Geografie

Dat Dörp liggt op de Oosterholter Geest. Dat Water ut dat Rebeed flütt över’n Ollendörper Beek na de Luun hen af.

De Naveröörd sünd Wellen un Helljes in’n Noordoosten, Steern un Paddewisch in’n Süüdoosten, Lübbs in’n Süden, Ax in’n Süüdwesten, Loh in’n Westen un Hassbüttel, Bokel, Stubben un Bruunshusen in’n Noordwesten.

Historie

In Ollendörp is 1938 von’n Rieksarbeidsdeenst dat Waldheim inricht worrn, en Lager för Froonslüüd. Düt Maidenlager hett bet 1945 bestahn. Na dat Enn von’n Tweten Weltkrieg hebbt de Kreisbehörden in dat Lager 200 Verdrevene ut de Oostrebeden ünnerbrocht. De letzten Bewahners hebbt dat Lager 1968 verlaten. Vondaag is von dat Lager nix mehr nableven.

Verwaltungsgeschicht

In de Franzosentied von 1810 bet 1814 hett de Oort to de Mairie Beverst in’n Kanton Beverst höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

Bet 1851 hett Ollendörp to de Huusvaagdie Beverst in dat Gericht Beverst tohöört un is denn Deel von dat Amt Beverst worrn. 1859 is dat Amt denn aver al wedder oplööst worrn. Ollendörp keem nu an dat Amt Oosterholt, ut dat 1885 de Kreis Oosterholt worrn is. As 1932 de Kreis Oosterholt mit’n Kreis Blomendal tohoopleggt worrn is, is dor de Kreis Oosterholt von worrn, so as wi em vondaag kennt.

Mit de Gemeenreform in Neddersassen an’n 1. März 1974 hett sik Ollendörp mit de Gemenen Helljes un Steern tohoopdaan un de ne’e Gemeen Holste billt, de ehren Naam von de Anfangsbookstaven von de dree Dörper hett (Helljes, Ollendörp, Steden).

Inwahnertall

Religion

Ollendörp is evangeelsch-luthersch präägt un höört to dat Kaspel von de Fabian-un-Sebastian-Kark in Beverst.

För de Kathoolschen is de Hillige-Familie-Kark in Oosterholt-Scharmbeek tostännig.

Kultur

Verenen

De Schüttenvereen Ollendörp is 1919 grünnt worrn.

Weertschop un Infrastruktur

Ollendörp hett en egene freewillige Füürwehr.

In Ollendörp sitt dat von Richard Weize grünnte Musiklabel Bear Family Records.

Verkehr

Dör Ollendörp löppt de Landsstraat 128, de in’n Noorden över Wellen na Beverst an de Bundsstraat 71 ran geiht un in’n Süden över Lübbs na Hambargen an de B 74 ran. In’n Süüdoosten geiht de Kreisstraat 22 na Steern an de K 23, de von dor na Wallhöben an de B 74 föhrt. In’n Süüdwesten löppt en lüttjere Straat na Ax.

De nächste Autobahn is de Autobahn 27 (Afsnidd Bremen–Bremerhoben). De Opfohrt 13 Uthleer liggt so 19 Kilometer in’n Süüdwesten von Ollendörp an de K 48.

De nächsten Bahnhööv sünd so bi söven Kilometer wied weg an de Bahnlien Bremen–Bremerhoben in’n Noordwesten de Bahnhoff Stubben un in’n Süüdwesten de Bahnhoff Lübbs.

Footnoten

Kategorie:Oort Kategorie:Landkreis Oosterholt