Jan Oeltjen (* 15. August 1880 in Jaderbarg; † 13. Februar 1968 in Ptuji) weer en düütsch Maler un Grafiker.
He hett de Böverrealschool in Ollnborg besöcht un ansluutend Maleree in Berlin (bi Franz Lippisch) un München studeert. In eerste Ehe weer he mit de Lippisch-Schölerin Johanna Feuereisen verheiraadt, mit de he een Dochter harr. He hett tallriek Reisen ünnernommen un dorbi 1910 up de Insel Ischia de Malerin un Bildhauerin Elsa Kasimir kennen lehrt, de he nah sien Scheeden vun Johanna 1914 heiraadt hett. Mit hör harr he ok een Dochter. Nah de Heiraadt hemm se eerst in Wien leevt, tüschen 1920 und 1930 aber överweegend in Jaderbarg. 1931 sünd se endgültig in de Heimat vun sien Frau, Else Oeltjen-Kasimir (1887 – 1944), nah Ptuji, dat dormalige Pettau, in dat hüüdig Slowenien trucken.
Sien Biller un Grafiken in dat Landsmuseum Ollnborg un de Landsgalerie Hannover wurrn 1937 vun de Nazis ünner Beslagg nommen. Oeltjen weer in Ptuji as Restaurator beschäftigt. 1959 reis he to’n letzten Mal nah Düütschland. In Slowenien gellt he hüüd as Begrünner vun de Landschapsmaleree dor. In sien letzt Johren verlor he sien Sehkraft tonehmends.
Born Artikel in‘ Anzeiger für Harlingerland, an‘ 22. Juli 2017, Siet 33
Weblenken Dat Künstlerhuus Jan Oeltjen in Jaderbarg mit kumplett Biografie vun hüm un sien Frau as ok Uttüg vun hör Warken
Kategorie:Mann Kategorie:Börger von Düütschland Kategorie:Börger von Slowenien Kategorie:Maler Kategorie:Grafiker Kategorie:Landschapsmaler Kategorie:Boren 1880 Kategorie:Storven 1968