Wehldörp () is en lütten Oort in de Gemeen Cuxhoben in’n Landkreis Cuxhoben, Neddersassen. Binnen de Gemeen höört de Oort to de polietsche Oortschop Olenbrook.

To Wehldörp höört ok de Hoff Blink.

Geografie

De Oort liggt in de Masch direkt achtern Diek von de Ünnerelv in Hadeln. Dat Water ut dat Rebeed warrt över Gravens na’n Olenbroker Kanaal hen afföhrt. Vör Wehldörp liggt an de Elv dat Glameyer-Stack.

De Naveröörd sünd Müggendörp in’n Oosten, Aßel in’n Süüdoosten, dat Oosterenn von Olenbrook in’n Süden un Olenbrook un Udendörp in’n Westen.

Historie

Verwaltungsgeschicht

De Oort hett fröher to dat Kaspelsgericht Westerenn-Oterndörp von dat Land Hadeln tohöört un von 1852 af an to dat Amt Oterndörp. Na 1885 weer dat in’n Kreis Hadeln. 1932 is dat Deel von’n Kreis Land Hadeln worrn un 1977 von’n Landkreis Cuxhoben.

De Oort weer ganz fröher Deel von de Gemeen Westerenn Oterndörp. 1929 is de Oort denn aver in de Gemeen Olenbrook wesselt, de an’n 1. Juli 1972 mit de Gemeenreform in Neddersassen Deel von de Gemeen Cuxhoben worrn is. Sietdem billt Olenbrook binnen de Gemeen en Oortschop, to de ok Wehldörp mit tohöört.

Inwahnertall

Religion

Wehldörp is evangeelsch-luthersch präägt un höört to dat Kaspel von de Severus-Kark in Oterndörp.

För de Kathoolschen is de Twölv-Apostels-Kark in Olenwoold tostännig, de siet 2008 to de Karkengemeen St. Marien in Cuxhoben tohöört.

Weertschop un Infrastruktur

Verkehr

Dör Wehldörp löppt de Kreisstraat 4, de in’n Westen na Olenbrook geiht un in’n Oosten na Oterndörp. Över beide Öörd kann een na de Bundsstraat 73 kamen, de von Olenbrook in’n Noordwesten na Cuxhoben löppt un von Oterndörp in’n Süüdoosten över Neehuus, Kumbarg un Hemmoor na Stood.

De nächste Autobahn is de Autobahn 27 (Afsnidd Cuxhoben–Bremerhoben). De Opfohrt 1 Cuxhoben liggt so acht Kilometer in’n Noordwesten von Wehldörp an de B 73.

De nächste Bahnhoff is so bi söss Kilometer wied weg in’n Süüdoosten de Bahnhoff Oterndörp an de Nedderelvbahn von Cuxhoben na Hamborg.

Scholen

De Kinner ut Wehldörp gaht na de Grundschool Olenbrook.

Lüüd

De Footballspeler André Hahn is op’n Hoff Blink in Wehldörp groot worrn.

Footnoten

Kategorie:Oort Kategorie:Landkreis Cuxhoben