Wohlsdörp () is en Dörp in de Gemeen Scheeßl in’n Landkreis Rodenborg, Neddersassen. Binnen de Gemeen billt de Oort en egen polietsche Oortschop.

Geografie

Dat Water ut dat Rebeed flütt över Gravens na de Wümm hen af. Twee Kilometer in’n Noorden von dat Dörp münnt de Veers in’e Wümm. Düt Rebeed is as Naturschuulrebeed Veersdaal schuult.

De Naveröörd sünd Veersbrügg un Jeersdörp in’n Noorden, Scheeßl un Veers in’n Noordoosten, Badlsdörp in’n Oosten, Brookel un Wensbrook in’n Süüdoosten, Heemsbünnen un Worth in’n Süden, Rodenborg in’n Süüdwesten, Luhn in’n Westen un Borchel un Westerholt in’n Noordwesten.

Historie

Wohlsdörp kummt üm 1250 rüm as Wolstorp toeerst in de Oorkunnen vör.

In’n Tweten Weltkrieg sünd negen Soldaten ut Wohlsdörp fullen oder vermisst.Onlineprojekt Gefallenendenkmäler

Verwaltungsgeschicht

In de Franzosentied von 1810 bet 1814 hett de Oort to de Mairie Rodenborg in’n Kanton Rodenborg höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort hett vör 1885 to de Amtsvaagdie Scheeßl in dat Amt Rodenborg tohöört. Na 1885 weer dat in’n Kreis Rodenborg, de 1977 mit’n Landkreis Bremervöör to’n ne’en, grötteren Landkreis Rodenborg tohoopgahn is.

De Oort hett fröher tohoop mit Badlsdörp en Buurschop billt, is aver in dat 19. Johrhunnert en egen Gemeen worrn, de an’n 1. März 1974 mit de Gemeenreform in Neddersassen Deel von de Gemeen Scheeßl worrn is. Sietdem billt de Oort binnen de Gemeen en Oortschop mit egen Oortsraad mit fiev Maten un Oortsbörgermeester.

Inwahnertall

Religion

Wohlsdörp is evangeelsch-luthersch präägt un höört to dat Kaspel von de Lucas-Kark in Scheeßl.

För de Kathoolschen is de Corpus-Christi-Kark in Rodenborg tostännig.

Gemeenraad

Liddmaten 2011: CDU: Hans-Jürgen Conrad, Cord Dittmer, Sandra Everding, Gisela Kracke, Joachim Lohmann 2016: CDU: Cord Dittmer, Sandra Everding, Jannick-Noah Herrmann, Gisela Kracke, Joachim Lohmann

Börgermeesters

Tied Naam Partei 1996–2016 Hans-Jürgen Conrad 2016– Gisela Kracke

Kultur

Gedenktafeln för de Fullenen ut’n Tweten Weltkrieg hängt in Scheeßl in de Kark.

Verenen

De Schüttenvereen Wohlsdörp is an’n 29. März 1914 grünnt worrn.

Weertschop un Infrastruktur

Wohlsdörp hett en egene freewillige Füürwehr, de 1934 grünnt worrn is.

Verkehr

Dör Wohlsdörp löppt de Kreisstraat 211, de in’n Westen in Rodenborg an de Bundsstraat 71 ran geiht un in’n Oosten över Badlsdörp na Westervees an de Landsstraat 131. In Badlsdörp warrt de K 211 von de K 224 krüüzt, de in’n Noorden an de B 75 ran löppt un in’n Süüdoosten na Brookel an de B 71.

De nächste Autobahn is de Autobahn 1 (Afsnidd Hamborg–Bremen). De Opfohrten 48 Elsdörp, 49 Bokel un 50 Stuckenbossel doot all dree so 18 Kilometer wied weg von Wohlsdörp liggen.

De nächste Bahnhööv sünd so bi söven Kilometer wied weg de Bahnhoff Rodenborg in’n Süüdwesten un de de Bahnhoff Scheeßl in’n Noordoosten. De Bahnhööv doot all beid an de Bahnlien Hamborg–Bremen liggen.

Scholen

In dat Dörp gifft dat en Kinnergoorn. Fröher harr Wohlsdörp ok en Volksschool, vondaag gaht de Kinner op de Grundschool Scheeßl.

Footnoten

Kategorie:Oort Kategorie:Landkreis Rodenborg (Wümm)