Varel () is en lütten Oort in de Gemeen Scheeßl in’n Landkreis Rodenborg, Neddersassen. Binnen de Gemeen höört de Oort to de polietsche Oortschop Scheeßl.

Vondaag is de Oort Scheeßl bet dicht an Varel ranwussen.

Geografie

De Oort liggt in’n Westen von de Lümbörger Heid an dat Süüdöver von de Wümm.

De Naveröörd sünd Helsch un Griemshoop in’n Noorden, Rehr un Lauenbrüch in’n Noordoosten, Oostervees un Westervees in’n Süüdoosten, Scheeßl un Jeersdörp in’n Süüdwesten, Westeresch in’n Westen un Wenkeloh un Hunhoorn in’n Noordwesten.

Historie

En Buurnhuus ut Varel is afboot un in Stood wedder opboot worrn. Dat Gebüüd is 1912 in Stood inwieht un dor as Gasthuus in dat Museum op de Insel bruukt worrn. 1992 is dat Gebüüd dör en Füürböter kumplett afbrennt.

Verwaltungsgeschicht

De Oort hett vör 1885 to de Amtsvaagdie Scheeßl in dat Amt Rodenborg tohöört. Na 1885 weer dat in’n Kreis Rodenborg, de 1977 mit’n Landkreis Bremervöör to’n ne’en un grötteren Landkreis Rodenborg tohoopgahn is.

De Oort höört al von öllers bi de Gemeen Scheeßl mit bi, de an’n 1. März 1974 mit de Gemeenreform in Neddersassen düüdlich grötter worrn is. Sietdem höört de Oort binnen de Gemeen to de Oortschop Scheeßl.

Inwahnertall

Religion

Varel is evangeelsch-luthersch präägt un höört to dat Kaspel von de Lucas-Kark in Scheeßl.

För de Kathoolschen is de Corpus-Christi-Kark in Rodenborg tostännig.

Weertschop un Infrastruktur

Verkehr

Nich wied af von Varel löppt de Bundsstraat 75 langs, de in’n Noordoosten över Lauenbrüch un Töst na Bookholt geiht un in’n Süüdwesten över Scheeßl na Rodenborg un Otterbarg. En Stück in’n Süden von Varel liggt de Krüzung von de B 75 mit de Landsstraten L 130 un L 131. De L 130 föhrt in’n Noorden över Helsch un Homersen na Zittens un de L 131 in’n Süüdoosten över Westervees un Deepen na Hemslingen.

De nächste Autobahn is de Autobahn 1 (Afsnidd Hamborg–Bremen). De Opfohrt 47 Zittens liggt so 14 Kilometer in’n Noorden von Varel an de L 130.

De nächste Bahnhoff is so bi dree Kilometer wied weg in’n Süden de Bahnhoff Scheeßl an de Bahnlien Hamborg–Bremen.

Footnoten

Kategorie:Oort Kategorie:Landkreis Rodenborg (Wümm)