duum|Buurnhoff in Lutten Lutten () is en Dörp in de Gemeen Kerklinneln in’n Landkreis Veern, Neddersassen. Binnen de Gemeen Kerklinneln billt de Oort de polietsche Oortschop Lutten.

Bi Lutten höört von öllers ok de lüttjere Oort Bestern mit to.

Geografie

De Oort liggt op de Achem-Veerner Geest an’n Rand na de Maschen langs de Aller. Dat Water ut dat Rebeed flütt över’n Luttener Graven af, de in’n Gohbeek münnt (kort vör de Steed, an de de Gohbeek sülvs in de Aller münnt).

De Naveröörd sünd Wetenmöhlen in’n Noorden, Specken un Ramels in’n Noordoosten, Armsen in’n Oosten, Hogenabargen un Barnstäer in’n Süden, Ahnbargen in’n Süüdwesten, Bestern un Wahnbargen in’n Westen un Eitze in’n Noordwesten.

Historie

Lutten kummt 1274 as Lutten toeerst in en Oorkunn vör, in de Graaf Helmold von Swerin den halven Teegd in dat Dörp de Kark in Veern överlett.

An’n 13. Mai 1971 is en nedderlandschen Kampffleger von’n Typ Canadair NF-5 mit en Parduun von’n Senner Veern bi Lutten tohoopstött un in en Huus afstört. De Piloot is doodbleven, aver ans hett dat keen Dode geven.

Verwaltungsgeschicht

In de Franzosentied von 1810 bet 1814 hett de Oort to de Mairie Kerklinneln in’n Kanton Veern höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort hett vör 1885 to de Vaagdie Eitze in dat Amt Veern tohöört. Na 1885 weer dat in’n Kreis Veern, de 1932 mit’n Kreis Achem to’n ne’en un grötteren Kreis Veern tohoopgahn is.

De Oort is an’n 1. Juli 1972 mit de Gemeenreform in Neddersassen Deel von de Gemeen Kerklinneln worrn. Sietdem billt de Oort binnen de Gemeen en Oortschop mit egen Oortsvörsteiher.

Inwahnertall

* tohoop mit Bestern

Religion

Lutten is evangeelsch-luthersch präägt un höört to dat Kaspel von de Jakobi-Kark in Wittloh. Bet 1973 hett de Oort to dat Kaspel von de Andreas-Kark in Veern höört.

För de Kathoolschen is de St.-Josef-Kark in Veern tostännig.

Börgermeesters/Oortsvörsteihers

Börgermeesters: ~1964: Helmut Blome

Oortsvörsteihers: –2016: Hans-Jürgen Bothe (CDU) 2016–: Claus-Hermann Hoops (CDU)

Kultur

Verenen

De Schüttenvereen Lutten is an’n 29. März 1914 grünnt worrn un de Heimatvereen an’n 15. April 2010. De Heimatvereen hett sik ut de Dörpgrupp Lutten in’n Heimatvereen Kerklinneln billt, de al siet 1985 bestünn.

Sportvereens gifft dat twee: den TSV Lohbarg von 1975 un den TSV Lutten.

Weertschop un Infrastruktur

Lutten hett en egene freewillige Füürwehr, de an’n 19. Januar 1965 grünnt worrn is.

Bi Lutten steiht de Funtoorn Senner Veern.

Verkehr

An Lutten langs löppt de Landsstraat 160, de in’n Noordwesten över Eitze na Veern an de Bundsstraat 215 ran geiht un in’n Süüdoosten över Hogenabargen un Süüdkampen na Kerkboitzen an de B 209. De Luttener Dörpstraat geiht in’n Noordoosten an de Kreisstraat 38, de in’n Süüdoosten na Armsen un Neernabargen löppt un in’n Noorden na Wetenmöhlen an de K 21 ran. De K 21 geiht denn wieder na Kerklinneln an de L 171.

De nächste Autobahn is de Autobahn 27 (Afsnidd Bremen–Wasra). De Opfohrt 26 Veern-Oost liggt söss Kilometer in’n Noordwesten von Lutten an de L 171.

De nächste Bahnhoff is so bi söss Kilometer wied weg in’n Noordwesten de Bahnhoff Veern an de Bahnlien Wunsdörp–Bremen. Disse Bahnhoff is ok inbunnen in dat Nett von de Regio-S-Bahn Bremen/Neddersassen. Op de Bahnlien Veern–Wasra hett dat von 1910 bet 1969 Personenverkehr geven. De Bahnhoff Lutten leeg en beten buten dat Dörp in’n Süüdwesten.

Scholen

De Kinner ut Lutten un ut de Öörd ümto gaht na de Grundschool Lutten.

Literatur

Helmut Meyer: Dorfchronik Luttum. 1997

Footnoten

Weblenken

Websteed över dat Dörp (hoochdüütsch)

Kategorie:Oort Kategorie:Landkreis Veern