Wörpdörp () is en Dörp in de Gemeen Grasbarg in’n Landkreis Oosterholt, Neddersassen.

Geografie

De Oort liggt in dat Düvelsmoor. Dat Water ut dat Rebeed warrt över Gravens na de Wörp hen afföhrt.

De Naveröörd sünd Seehusen in’n Noorden, Tarms in’n Noordoosten, Wilst un Wilstermoor in’n Oosten, Grasbarg un Eekdorp in’n Süden, Worphusen un Schrötersdörp in’n Westen un Moorenn in’n Noordwesten.

Historie

Wörpdörp is 1751 as 5,5 Kilometer lang Stratendörp un findörpsche Moorkolonie grünnt worrn. Allens tohoop sünd dor 51 Steden to 50 Morgen Land anleggt worrn.

In’n Eersten Weltkrieg sünd 32 Soldaten ut Wörpdörp fullen oder vermisst un in’n Tweten Weltkrieg 64.Onlineprojekt Gefallenendenkmäler

Verwaltungsgeschicht

In de Franzosentied von 1810 bet 1814 hett de Oort to de Mairie St. Jürgen in’n Kanton Leendaal höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort hett vör 1885 to de Moorvaagdie Huttenbusch in dat Amt Otterbarg tohöört un von 1852 bet 1885 to dat Amt Leendaal. Na 1885 weer dat in’n Kreis Oosterholt, de 1932 mit’n Kreis Blomendal to’n ne’en un grötteren Kreis Oosterholt tohoopgahn is.

1968 sünd Eekdorp, Wörpdörp un Grasbarg to een Gemeen tohoopgahn. Düsse Gemeen is an’n 1. März 1974 mit de Gemeenreform in Neddersassen Deel von de nu düüdlich gröttere Gemeen Grasbarg worrn.

Inwahnertall

Religion

Wörpdörp is evangeelsch-luthersch präägt un höört to dat Kaspel von de Findörp-Kark in Grasbarg.

För de Kathoolschen is de Goden-Hirt-Kark in Leendaal tostännig, de siet 1. September 2012 to de Karkengemeen von de Hillige-Familie-Kark in Oosterholt-Scharmbeek höört. De Goden-Hirt-Kark is 1961 boot worrn.

Kultur

In Wörpdörp steiht en Denkmaal för de Fullenen ut de twee Weltkrieg’.

Verenen

De Schüttenvereen Wörpdörp is 1876 grünnt worrn.

Weertschop un Infrastruktur

För Wörpdörp is de freewillige Füürwehr Grasbarg tostännig, de fröher ok den Dubbelnaam Füürwehr Grasbarg-Wörpdörp dragen hett.

Verkehr

De Dörpstraat dör Wörpdörp is de Landsstraat 133, de in’n Noordoosten över Tarms na Zeven geiht un in’n Süüdwesten na Leendaal un na Bremen rin. De L 133 warrt in Wörpdörp von de Kreisstraat 10 krüüzt, de in’n Noordwesten na Worpsweed löppt un in’n Süden över Grasbarg na Rutendorp an de L 154. An’t Süüdwestenn von dat Dörp geiht von de L 133 de L 153 af, de na Worpsweed un op Huttenbusch to föhrt.

De nächste Autobahn is de Autobahn 27 (Afsnidd Bremen–Wasra). De Opfohrt 19 Horn-Leh liggt so 16 Kilometer in’n Süüdwesten von Wörpdörp an de Leendaler Heerstraat.

De nächste Bahnhoff is so bi 16 Kilometer wied weg in’n Süden de Bahnhoff Sao’ern an de Bahnlien Hamborg–Bremen. Op de Bahnlien Bremen–Tarms hett dat von 1900 bet 1956 Personenverkehr geven. Wörpdörp harr en egen lütten Bahnhoff an düsse Bahnlien.

Scholen

De Kinner ut Wörpdörp gaht na de Grundschool Grasbarg.

Footnoten

Kategorie:Oort Kategorie:Landkreis Oosterholt