Dannenbarg () is en Dörp in de Gemeen Grasbarg in’n Landkreis Oosterholt, Neddersassen.

To Dannenbarg höört ok de Oortsdeel Nee-Dannenbarg.

Geografie

De Oort liggt in dat Düvelsmoor. Dat Water ut dat Rebeed warrt över’n Saatmoorgraven na de Wörp hen afföhrt.

De Naveröörd sünd Grasdörp in’n Noorden, Meinershusen in’n Oosten, Wienkoopsmoor in’n Süüdoosten, Seebargen in’n Süüdwesten un Heidbarg in’n Westen.

Historie

Dannenbarg is 1780 as 1,5 Kilometer lang Stratendörp un Moorkolonie in dat Düvelsmoor grünnt worrn.

Verwaltungsgeschicht

In de Franzosentied von 1810 bet 1814 hett de Oort to de Mairie Hu’e in’n Kanton Otterbarg höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort hett vör 1885 to de Moorvaagdie Grasdörp in dat Amt Otterbarg tohöört un von 1852 bet 1885 to dat Amt Leendaal. Na 1885 weer dat in’n Kreis Oosterholt, de 1932 mit’n Kreis Blomendal to’n ne’en un grötteren Kreis Oosterholt tohoopgahn is.

1929 sünd de Gemenen Meinershusen un Wienkoopsmoor an de Gemeen Dannenbarg anslaten worrn. De Gemeen Dannenbarg is denn an’n 1. März 1974 mit de Gemeenreform in Neddersassen Deel von de Gemeen Grasbarg worrn.

Inwahnertall

Religion

Dannenbarg is evangeelsch-luthersch präägt un höört to dat Kaspel von de Findörp-Kark in Grasbarg.

För de Kathoolschen is de Goden-Hirt-Kark in Leendaal tostännig, de siet 1. September 2012 to de Karkengemeen von de Hillige-Familie-Kark in Oosterholt-Scharmbeek höört. De Goden-Hirt-Kark is 1961 boot worrn.

Kultur

Verenen

De TSV Dannenbarg is 1929 grünnt worrn.

Weertschop un Infrastruktur

Dannenbarg hett en egene freewillige Füürwehr, de 1942 grünnt worrn is.

Verkehr

De Dörpstraat dör Dannenbarg is de Kreisstraat 27, de in’n Westen na Heidbarg an de Landsstraat 154 geiht un in’n Oosten an de K 10. De L 154 föhrt von Heidbarg wieder na Falkenbarg un över de Landsstraat 133 na Leendaal. De K 10 föhrt in’n Noorden na Grasbarg un in’n Süden in Rutendorp ok an de L 154. Von Rutendorp geiht de L 154 in’n Oosten na Quelkhoorn un an Hu’e langs na Otterbarg.

De nächste Autobahn is de Autobahn 27 (Afsnidd Bremen–Wasra). De Opfohrt 19 Horn-Leh liggt so 14 Kilometer in’n Süüdwesten von Dannenbarg an de Leendaler Heerstraat.

De nächste Bahnhoff is so bi 13 Kilometer wied weg in’n Süden de Bahnhoff Sao’ern an de Bahnlien Hamborg–Bremen. Op de Bahnlien Bremen–Tarms hett dat von 1900 bet 1956 Personenverkehr geven. De Bahnhoff Falkenbarg weer in düsse Tied veer Kilometer in’n Westen.

Scholen

De Kinner ut Dannenbarg gaht na de Grundschool Grasbarg.

Footnoten

Kategorie:Oort Kategorie:Landkreis Oosterholt