Lütt Söttmer () is en Dörp in de Gemeen Söttmer (Samtgemeen Söttmer) in’n Landkreis Rodenborg, Neddersassen. Fröher weren Lütt Söttmer un Groot Söttmer polietsch twee Öörd, vondaag sünd se aver to een Dörp tohoopslaten.
Geografie
Dat Dörp liggt op dat rechte Över von de Wiest. Op dat linke Över liggt Groot Söttmer.
De Naveröörd sünd Clüversbossel in’n Noorden, Sleßel in’n Noordoosten, Jeerhoff in’n Oosten, Hassendörp in’n Süüdoosten, Groot Söttmer in’n Süden, Barkhoff un Stuckenbossel in’n Süüdwesten un Eckstever un Reeßen in’n Noordwesten.
Historie
Üm den Oort Söttmer geev dat jümmer wedder Stried twüschen dat Hoogstift Veern un dat Arzstift Bremen. Dat hett dorto föhrt, dat de Oort langs de Wiest opdeelt weer. Lütt Söttmer hett to dat Amt Otterbarg in dat Arzstift Bremen höört un Groot Söttmer to dat Amt Rodenborg in dat Hoogstift Veern.
In’n Eersten Weltkrieg sünd 15 Soldaten ut Lütt Söttmer fullen oder vermisst.Onlineprojekt Gefallenendenkmäler
Verwaltungsgeschicht
In de Franzosentied von 1810 bet 1814 hett de Oort to de Mairie Horß in’n Kanton Otterbarg höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.
De Oort hett vör 1859 to de Huusvaagdie Otterbarg in dat Amt Otterbarg tohöört un denn von 1859 bet 1885 to dat Amt Rodenborg. Na 1885 weer dat in’n Kreis Rodenborg, de 1977 mit’n Landkreis Bremervöör tohoopgahn is un den hüdigen Landkreis Rodenborg billt hett.
Lütt Söttmer is an’n 1. Januar 1929 mit Groot Söttmer to de Gemeen Söttmer tohoopslaten worrn. De Gemeen Söttmer is an’n 1. März 1974 mit de Gemeenreform in Neddersassen noch wedder mit Evernhusen un Stuckenbossel tohoopgahn.
Inwahnertall
Religion
Lütt Söttmer is evangeelsch-luthersch präägt un höört to dat Kaspel von de Georg-Kark in Groot Söttmer.
För de Kathoolschen is de Corpus-Christi-Kark in Rodenborg tostännig.
Kultur
En Denkmaal för de Fullenen ut’n Krieg von 1870/1871 un den Eersten Weltkrieg steiht in Groot Söttmer achter de Kark.
Weertschop un Infrastruktur
Lütt Söttmer hett 1890 tohoop mit Groot Söttmer de freewillige Füürwehr Söttmer grünnt.
Verkehr
Dör Lütt Söttmer loopt de Kreisstraten K 201 un K 204. De K 201 löppt in’n Noorden na Taaken un Horß un in’n Süden na Groot Söttmer an de Bundsstraat 75. De K 204 geiht in’n Noordwesten na Reeßen (un von dor över de K 242 na Otterst) un in’n Noordoosten na Clüversbossel un Sleßel. De B 75 föhrt in’n Westen na Otterbarg un in’n Oosten na Rodenborg.
De nächste Autobahn is de Autobahn 1 (Afsnidd Hamborg–Bremen). De Opfohrt 50 Stuckenbossel liggt so twee Kilometer in’n Süüdwesten von Lütt Söttmer an de B 75.
De nächste Bahnhoff is so knapp veer Kilometer wied weg in’n Süden de Bahnhoff Söttmer an de Bahnlien Hamborg–Bremen.
Footnoten
Kategorie:Oort Kategorie:Landkreis Rodenborg (Wümm)