Stell () is en lütten Oort in de Gemeen Hellweeg (Samtgemeen Söttmer) in’n Landkreis Rodenborg, Neddersassen. De Oort höört polietsch al von öllers bi Hellweeg mit bi.
Geografie
De Oort liggt an’n Rand von en Geestbarg hen na dat Moor. Dat Water ut dat Rebeed flütt över den Rehnengraven na de Wümm hen af.
De Naveröörd sünd Hellweeg in’n Noordoosten, Bredenfellermoor un Hoberloo in’n Süüdoosten, Allerdörp un Stellsfellen in’n Süüdwesten un Postdörp un Evernhusen in’n Noordwesten.
Historie
Stell weer en Eddelgood, dat toeerst de Familie von Stell tohöört hett. Von ehr is dat op de Familie von Schlepegrell un later op de Familie von Münchhausen övergahn.
Burchard von Münchhausen harr blots twee Döchter. Dat Good is dorüm na sien Dood 1681 an siene Dochter Dorothea övergahn, de mit Ciriac von Bischwank verheiraadt weer. An’n 7. Dezember 1683 hebbt de beiden dat Good an Burchard sien annere Dochter Elisabeth un ehren Mann Christian Knütel verköfft.Gebhard von Lenthe, Hans Mahrenholtz: Schaumburger Studien. Utgaav 36, C. Bösendahl, 1976, Sied 178 Knütel sien eenzigen Söhn is fröh doodbleven un dat Good güng na Christian Knütel sien Dood 1714 an siene Dochter Elisabeth un ehren Mann Johann Christoph Brahde.
En Tied lang weer denn de Aftheker Matthies Majohl in Veern de Besitter. Siene Arven hebbt dat Good 1762 verköfft an’n vörherigen Pächter Claus Peter Böhling.Johann Heinrich Pratje: Vermischte historische Sammlungen. Band 3, Verlag des Vaterländischen Vereins, Stood 1845, Sied 66 De Familie Böhling höört dat Good ok vondaag noch to.
Goodsherrn
–1681: Burchard von Münchhausen 1681–1683: Ciriac von Bischwank 1683–1714: Christian Knütel 1714–1728: Johann Christoph Brahde 1728–: Christoph Hinrich Brahde
–1762: Matthies Majohl 1762–1797: Claus Peter Böhling 1797–1805: Habbo Claus Böhling 1805–1840: Johann Hinrich Böhling
Verwaltungsgeschicht
In de Franzosentied von 1810 bet 1814 hett de Oort to de Mairie Karkwals in’n Kanton Rodenborg höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.
De Oort hett vör 1885 to de Ünnervaagdie Ahusen von de Amtsvaagdie Ahusen in dat Amt Rodenborg tohöört. Na 1885 weer dat in’n Kreis Rodenborg, de 1977 mit’n Landkreis Bremervöör to’n ne’en un grötteren Landkreis Rodenborg tohoopgahn is.
Inwahnertall
Religion
Stell is evangeelsch-luthersch präägt un höört to dat Kaspel von de Marien-Kark in Ahusen.
För de Kathoolschen is de Corpus-Christi-Kark in Rodenborg tostännig.
Weertschop un Infrastruktur
Verkehr
Stell is över en lüttjere Straat in’n Westen verbunnen mit de Landsstraat 155 in Postdörp un in’n Noordoosten mit de Kreisstraat 205 in Hellweeg. De L 155 löppt in’n Noordwesten na Otterbarg an de L 168 un in’n Süüdoosten över Völkersen an de L 158 bi Langwedel. De K 205 geiht von Hellweeg in’n Noorden na Söttmer an de Bundsstraat 75 un in’n Süüdoosten na Ahusen un Karkwals.
De nächste Autobahn is de Autobahn 1 (Afsnidd Hamborg–Bremen). De Opfohrt 51 Posthusen liggt so veer Kilometer in’n Noordwesten von Stell an de L 155. De Opfohrt 24b Langwedel op de Autobahn 27 (Afsnidd Bremen–Wasra) liggt negen Kilometer in’n Süden.
De nächste Bahnhoff is so bi söven Kilometer wied weg in’n Noordwesten de Bahnhoff Otterbarg an de Bahnlien Hamborg–Bremen. De Bahnhööv Ädelsen un Bauen an de Bahnlien Wunsdörp–Bremen doot teihn Kilometer in’n Süüdwesten liggen. Disse beiden Bahnhööv sünd ok inbunnen in dat Nett von de Regio-S-Bahn Bremen/Neddersassen.
In Stell liggt de lütte Flegerplatz Werser-Wümm, de 1963 anleggt worrn is.
Footnoten
Kategorie:Oort Kategorie:Landkreis Rodenborg (Wümm)