De Familie von Brandt weer en Eddelfamilie.
Historie
De Familie geiht trügg op Jacob Brandt, de to Anfang von dat 17. Johrhunnert Bedeenten an’n sweedschen Königshoff weer. He harr mit siene Fro Anna Salvius den Söhn Peter Brandt (1609–1648). Peter Brandt stünn ok in sweedschen Deensten un is 1632 na de sweedsche Armee in Düütschland schickt worrn. För siene Deensten hett he den Rang von en General-Kriegs-Kommissär kregen un is an’n 30. Januar 1646 in’n Adelsstand hoven worrn.
He is in’n Besitt von de Göder Brook un Rüst kamen. Dat Good Brook keem ut’n Besitt von sien Swiegervader Johann Salvius.
Peter sien Enkel Carl Gustav hett sik 1727 dor för insett, dat dat Good Brook in de Riddermatrikel von de Ridderschop von dat Hartogdom Bremen opnahmen warrt. Aver eerst na sien Dood is dat Good ünner sien Söhn Peter ok würklich Riddergood worrn. Peter harr aver keen Söhns un dorüm is dat Good över Peter siene Dochter Juliane Victoria an de Familie von Cronhelm övergahn.
Aemilius Wilhelm von Brandt hett 1729 dat Good Braamst köfft, mit dat he bi de Ridderschop immatrikuleert worrn is. Dat Good hett siene Dochter Anna Margaretha arvt, över de dat an de Familie von Uckermann övergahn is.
Wapen
Dat Wapen wiest op sülvern Grund en blauen Spoorn, ünner den en Stück Holt to sehn is, dat brennt. An de Sieden is je een gröne Ecker, de pielop steiht. Ünner’n apenen Helm liggt en gollen Kroon un op de Kroon en opricht Stück Holt, dat baven brennt, twüschen twee Büffelhöörn. Dat Hoorn op de rechte Sied is halv swart un halv gollen, dat annere halv sülver un halv blau.Johann Heinrich Pratje: Vermischte historische Sammlungen. Band 2, Verlag des vaterländischen Vereins, Stood 1844, Sied 178ff
Stammlien
Footnoten
Kategorie:Adelsslecht