Wüstenhöben () is en Dörp in de Gemeen Töst (Samtgemeen Töst) in’n Landkreis Horborg, Neddersassen. De Oort höört polietsch al von öllers bi Töst mit bi.

Geografie

In’n Westen flütt de Heidenauer Au langs, de later in de Oost münnt. De Duhrner Möhlenbeek in’n Oosten münnt in de Eest. In’n Süüdwesten liggt dat Naturschuulrebed Groot Moor bi Wist.

De Naveröörd sünd Makensbrook in’n Noorden, Duhrn un Hääg in’n Noordoosten, Glüsen un Töst in’n Süüdoosten, Wist in’n Süden, Veloh in’n Süüdwesten, de Herwigshoff in’n Westen un Evsdörp un Avens in’n Noordwesten.

Historie

To de öllsten Funnen ut dat Rebeed von Wüstenhöben höört en Gräverfeld von de Langobarden ut de Tied üm 200 n. Chr.

In’n Eersten Weltkrieg sünd veer Soldaten ut Wüstenhöben fullen oder vermisst.http://www.denkmalprojekt.org/dkm_deutschland/tostedt.htm

Verwaltungsgeschicht

In de Franzosentied von 1810 bet 1814 hett de Oort to de Mairie Töst in’n Kanton Töst höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort hett vör 1852 to de Vaagdie Töst in dat Amt Horborg tohöört. 1852 is de Vaagdie Töst in dat Amt Mesborg wesselt, dat 1859 denn in dat Amt Töst ümwannelt worrn is. Na 1885 weer dat in’n Kreis Horborg. 1932 is dat Deel von’n ne’en, grötteren Kreis Horborg worrn.

De Oort is an’n 1. Juli 1972 as Deel von de Gemeen Töst mit de Gemeenreform in Neddersassen an de nu gröttere Gemeen Töst kamen.

Inwahnertall

Religion

Wüstenhöben is evangeelsch-luthersch präägt un höört to dat Kaspel von de Johannes-de-Döper-Kark in Töst.

För de Kathoolschen is de Hillig-Hart-Kark in Töst tostännig, de siet 1. November 2014 to de Karkengemeen St. Petrus in Bookholt tohöört.

Kultur

En Denkmaal för de Fullenen ut’n Eersten Weltkrieg steiht in Töst.

Weertschop un Infrastruktur

An’n Noordrand von dat Dörp steiht de lütte Windpark Wüstenhöben mit dree Windrääd.

Verkehr

Dör Wüstenhöben löppt de Kreisstraat 15, de in’n Noordwesten na Avens, Evsdörp un Holv geiht un in’n Süüdoosten na Töst an de Bundsstraat 75 ran. De B 75 geiht von Töst ut denn in’n Süüdwesten na Lauenbrüch, Scheeßl un Rodenborg un in’n Noordoosten över Kakenstörp na Bookholt. En lüttjere Straat gifft dat ans noch von Wüstenhöben na Duhrn un dor an de Landsstraat 141 ran.

De nächste Autobahn is de Autobahn 1. De Opfohrt 46 Heidenau liggt so söss Kilometer in’n Noordwesten von Wüstenhöben an de K 15.

De nächste Bahnhoff is so bi fiev Kilometer wied weg in’n Süüdoosten de Bahnhoff Töst an de Bahnlien Hamborg–Bremen. Von 1917 bet 1971 harr Wüstenhöben ok en lütten Bahnhoff an de Bahnlien Wilst–Töst.

Scholen

De Kinner ut Wüstenhöben gaht na de Grundschool Töst (Standoort Dieckhofstraat) op School. Na de Grundschool gaht de Kinner normalerwies wieder in Töst na School, op de Hauptschool Töst, de Realschool Töst oder dat Gymnasium Töst.

Literatur

Willi Wegewitz: Der langobardische Urnenfriedhof von Tostedt-Wüstenhöfen im Kreise Harburg. Lax, 1944 Das Gräberfeld von Tostedt-Wüstenhöfen: zur Frage geschlechterspezifischer Bestattungsplätze. 1992

Footnoten

Kategorie:Oort Kategorie:Landkreis Horborg