Ninndörp () is en Dörp in un Seet von de Gemeen Rosengoorn in’n Landkreis Horborg, Neddersassen.

Geografie

Ninndörp liggt an’n Oostrand von de Horbörger Bargen. In’n Noordwesten liggt de Gannabarg.

De Naveröörd sünd Sieversen un Leversen in’n Noorden, Westerhoff, Tötsen, Jiddens un Hinteln in’n Noordoosten, Klecken un Eekel in’n Süüdoosten, Büüns un Vaans in’n Süden, Dibbersen un Dangersen in’n Süüdwesten, Ems in’n Westen un Langenrehm in’n Westen.

Historie

In’n Düütsch-Franzööschen Krieg 1870/1871 sünd twölv Soldaten ut Ninndörp fullen oder vermisst, in’n China-Krieg een, in’n Eersten Weltkrieg ölven un in’n Tweten Weltkrieg 36.http://www.denkmalprojekt.org/dkm_deutschland/nenndorf.htm

Verwaltungsgeschicht

In de Franzosentied von 1810 bet 1814 hett de Oort to de Mairie Hittfeld in’n Kanton Hittfeld höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort hett vör 1852 to de Vaagdie Hittfeld in dat Amt Horborg tohöört un denn von 1852 bet 1859 to dat Amt Hittfeld. 1859 is dat wedder Deel von dat Amt Horborg worrn. Na 1885 weer dat in’n Kreis Horborg. 1932 is dat Deel von’n ne’en, grötteren Kreis Horborg worrn.

De Oort is an’n 1. Juli 1972 mit de Gemeenreform in Neddersassen Deel von de Gemeen Ninndörp worrn, de von 1973 af an denn Gemeen Rosengoorn heten hett. Ninndörp billt nu en Oortschop binnen de Gemeen Rosengoorn un hett en Oortsbörgermeester un en Oortsraad.

Inwahnertall

Religion

Ninndörp is evangeelsch-luthersch präägt un billt siet 1926 mit de Krüüzkark en egen Kaspel. Vörher hett de Oort to dat Kaspel von de Mauritius-Kark in Hittfeld höört.

För de Kathoolschen is de St.-Petrus-Kark in Bookholt tostännig.

Wapen

Dat Wapen von Ninndörp wiest op gollen Grund en swarten Klockentoorn.

Oortsbörgermeesters

opstunns: Bernd Lühmann

Kultur

En Denkmaal för de Fullenen ut den Düütsch-Franzööschen Krieg, den China-Krieg un de twee Weltkrieg’ steiht in Ninndörp an de Kark.

Verenen

De Schüttenvereen Ninndörp is 1898 grünnt worrn.

Weertschop un Infrastruktur

Ninndörp as Hauptoort von de Gemeen Rosengoorn gellt na dat Regionale Ruumordnungsprogramm as Grundzentrum för de Öörd in de Ümgegend.

De Oort hett en egene freewillige Füürwehr.

De Oort hett Filialen von de Spoorkass Horborg-Buxthu un de Volksbank Lümborger Heid.

Verkehr

Dör Ninndörp löppt de Kreisstraat 85, de fröher Deel von de Bundsstraat 75 weer. Vondaag geiht de K 85 aver eerst in’n Süüdwesten an de Autobahn 1 in de B 75 över. De B 75 geiht an Bookholt langs na Kakenstörp un Töst. In’n Noordoosten geiht de K 85 över Tötsen na Horborg. Von de K 85 geiht na Westen de K 26 af, de na Ems löppt, un na Süüdoosten de K 12 na Eekel, Klecken un Bendsdörp.

De nächste Autobahn is de Autobahn 1. De Opfohrt 42 Dibbersen liggt so een Kilometer in’n Süüdwesten von Ninndörp an de K 85. De nächste Opfohrt op de Autobahn 261 is de Opfohrt 3 Tötsen veer Kilometer in’n Noorden an de K 52.

De nächste Bahnhoff is so bi dree Kilometer wied weg in’n Süüdoosten de Bahnhoff Klecken an de Bahnlien Hamborg–Bremen.

Lüüd

De Tähndokter un Politiker Ehrhart Glaser hett von 1959 bet to sien Dood 2006 in Ninndörp leevt.

Literatur

Siegbert Groenitz: Nenndorfer Geschichten. 1993

Footnoten

Kategorie:Oort Kategorie:Landkreis Horborg