Schätzendörp () is en Dörp in de Gemeen Äästörp (Samtgemeen Hanstää) in’n Landkreis Horborg, Neddersassen.

Geografie

Dat Dörp liggt in de Lümbörger Heid. Twüschen Schätzendörp un Sohrndörp löppt de Büner Beek langs, de nich wied von dat Dörp af in de Smale Au münnt. De flütt denn wieder na Noorden na de Seev to.

De Naveröörd sünd Niendörp un Tiesenbarg in’n Noorden, Garlstörp in’n Noordoosten, Lübberstää un Äästörp in’n Süüdoosten, Sohrndörp un Su’möhlen in’n Süden, Unnel in’n Westen un Ollsen in’n Noordwesten.

Historie

Schätzendörp kummt 1244 toeerst in de Oorkunnen vör. De öllste Hoff in dat Dörp is de Degenhoff, de 1339 toeerst nawiest is. De öllsten Delen von dat hüdige Gebüüd sünd von 1527.

In’n Eersten Weltkrieg sünd acht Soldaten ut Schätzendörp fullen oder vermisst.http://www.denkmalprojekt.org/dkm_deutschland/egestorf.htm

Verwaltungsgeschicht

In de Franzosentied von 1810 bet 1814 hett de Oort to de Mairie Garlstörp in’n Kanton Garlstörp höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort hett vör 1885 to dat Amt Winsen tohöört. Blots von 1852 bet 1859 hett dat Dörp kort to dat Amt Solzhusen höört. Na 1885 weer dat in’n Kreis Winsen. 1932 is dat Deel von’n Landkreis Horborg worrn.

De Gemeen Schätzendörp is 1928 mit de Gemeen Sohrndörp tohoopleggt worrn. An’n 1. Juli 1972 is de Oort tohoop mit Sohrndörp Deel von de Gemeen Äästörp worrn.

Inwahnertall

Religion

Schätzendörp is evangeelsch-luthersch präägt un höört to dat Kaspel von de Stephanus-Kark in Äästörp.

Kultur

En Denkmaal för de Fullenen ut’n Eersten Weltkrieg steiht in Äästörp vör de Kark.

Verenen

Sohrndörp un Schätzendörp hebbt tohoop en freewillige Füürwehr, de 1936 grünnt worrn is.

Weertschop un Infrastruktur

Verkehr

Dör Schätzendörp löppt de Landsstraat 213, de in’n Noorden na Hanstää un Jesborg geiht un in’n Süüdoosten na Äästörp. Von de L 213 geiht na Noordwesten de Kreisstraat 46 na Ollsen af. In’n Süüdwesten löppt von Sohrndörp ut de K 27 na Unnel.

De nächste Autobahn is de Autobahn 7 (Afsnidd Hamborg–Hannover). De Opfohrt 41 Äästörp liggt so fiev Kilometer in’n Süüdoosten von Schätzendörp an de K 5.

De nächste Bahnhoff is so bi 15 Kilometer wied weg in’n Westen de Bahnhoff Handörp an de Heidbahn.

Scholen

In Schätzendörp gifft dat en Kita. Fröher harr Schätzendörp tohoop mit Sohrndörp en Volksschool.

De Kinner ut Schätzendörp gaht vondaag na de Grundschool Äästörp.

Lüüd

De Forstwirt un Buur Norbert Leben kummt ut Schätzendörp un hett dor mit sien Fro den Degenhoff mit en Gasthuus bedreven.

Literatur

Heinrich Schulz: Chronik von Schätzendorf. 1949

Footnoten

Kategorie:Oort Kategorie:Landkreis Horborg