Lüra () is en lütten Oort in’n Stadtdeel Marmsdörp, Bezirk Horborg, Stadt Hamborg, de dicht an de Landsgrenz na Neddersassen liggt. De Oort höört polietsch al von öllers bi Marmsdörp mit bi.

Geografie

De Staatsforst in’n Westen von Lüra höört to’n Stadtdeel Eißendörp. Dat Rebeed üm Lüra höört to dat Landschopsschuulrebeed Marmsdörper Flottsandplaat.

De Naveröörd sünd Eißendörp un Appelbüttel in’n Noorden, Marmsdörp in’n Noordoosten, Sinsdörp in’n Oosten, Bääkdörp, Wooxdörp un Metzendörp in’n Süüdoosten, Tötsen in’n Süden, Leversen in’n Süüdwesten, Sottörp in’n Westen un Vohrndörp in’n Noordwesten.

Historie

De Oort dükert 1338 toeerst in en Oorkunn op, as Ludolf von Esdörp de Kark in Sinsdörp en Hoff in Luderade overlett. De Naam bedüüdt Steed, de von en Lüür raadt worrn is.

In de Franzosentied von 1810 bet 1814 hett de Oort to de Mairie Hittfeld in’n Kanton Hittfeld höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

As de Franzosen an’n 29. März 1814 ut Horborg aftagen sünd, hebbt se de Öörd Marmsdörp, Appelbüttel un Lüra kumplett dalbrennt.

De Oort hett vör 1885 to de Vaagdie Höpen in dat Amt Horborg tohöört. Blots in de Tied von 1852 bet 1859 hett de Oort kort to dat Amt Hittfeld höört. De Oort weer do al Deel von de Gemeen Marmsdörp. Mit dat Groot-Hamborg-Gesett is Lüra Deel von de Stadt Hamborg worrn.

Inwahnertall

Religion

Lüra is evangeelsch-luthersch präägt un höört to dat Kaspel von de Auferstehungskark in Marmsdörp. Fröher hett de Oort to de Kark in Sinsdörp tohöört.

För de Kathoolschen is de St.-Maria-Kark in Horborg tostännig. Disse Kark billt siet 2006 tohoop mit de Franz-Joseph-Kark in Wilstörp de Karkengemeen St. Maria-St. Joseph.

Weertschop un Infrastruktur

In’n Noorden von Lüra liggt de Goornmarkt Dehner.

Verkehr

Lüra liggt an de Bremer Straat, de in Neddersassen in de Kreisstraat 85 övergeiht un fröher Deel von de Bundsstraat 75 weer. In’n Noorden geiht de Straat ok glieks in de B 75 över, de na Noordoosten över Marmsdörp na Horborg löppt un dor in de Autobahn 253 övergeiht. In’n Süden geiht de K 85 över Tötsen un Ninndörp na Bookholt.

Glieks in Lüra liggt de Opfohrt 2 Marmsdörp/Lüra op de Autobahn 261. De Opfohrt 34 Marmsdörp op de Autobahn 7 liggt nich mehr as een Kilometer in’n Noorden von Lüra.

De nächste Bahnhoff is so bi söss Kilometer wied weg in’n Noordoosten de Hauptbahnhoff Horborg an de Nedderelvbahn un de Bahnlien Hamborg–Hannover.

Scholen

In dat 19. Johrhunnert sünd de Kinner ut Lüra al op de Volksschool von Marmsdörp na School gahn. Ok vondaag gaht se noch in Marmsdörp na School.

Literatur

Herbert Schulz: Marmstorfer Chronik mit den Ortschaften Appelbüttel und Lürade. 2013

Footnoten

Kategorie:Oort Kategorie:Bezirk Horborg