Christian Richard Bauer (* 11. September 1984 in Hamborg) is en düütschen un nedderdüütschen Schauspeler, Singer un Nedderdüütsch-Översetter. duum|Christian Richard Bauer, 2025
Leven Bauer füng al as Kind bi de Volksspielbühne Rissen an un speel dor bet 2009 so üm un bi 30 Rullen. Vele Wiehnachtsmärken un nedderdüütsche Kummedies, aver ok „Der Dieb, der nicht zu Schaden kam“ vun Dario Fo, „Black Coffee“ vun Agatha Christie, de Hamlet-Persiflage „Prinz von Dänemark“ un twee nedderdüütsche Musicals. Mit twölf Johr stunn he in sien eerste Hauptrull op de Bühn vun dat Hamborger Kellertheater.
Na sien Abitur studeer he eerst düütsche un nedderdüütsche Literatur un klassische Philologie, ehrdat he an de Schule für Schauspiel Hamburg dat Schauspeelstudium anfangen dee. Dor studeer he bi Lehrers as Michael Bogdanov, Jens Roth un Renate Bleibtreu. Wieldes studeer he ok klassischen Musical-Gesang bi Stephan Drakulich an de Joop van den Ende Academy in Hamborg un klassischen Gesang bi Christian Halseband vun de Hoochschool Ossenbrügge.
2010 weer he mit de Schauspeelschool toenn un speel den Hans vun Wittenstein in „Undine“ vun Jean Giraudox an dat Theaterhaus Hilmessen.
Noch ehr he mit de Schauspeelschool toenn weer, wörr he an't Mekelborgsche Staatstheater in Swerin engageert. Anner Engangements harr he in Bonn, Bruunswiek un op Tournee dör Düütschland un de Swiez.
Siet 2011 speelt he nu an't Ohnsorg-Theater in Hamborg. To’n Bispill as Demetrius in den „Sommernachtsdroom“ ünner de Regie vun Michael Bogdanov un as Cléante in „Der eingebildete Kranke“. 2015 speel he den Jean-Michel in dat Musical „La Cage aux Folles“ an de Siet vun Hartwig Rudolz, 2018 den Cornelius in „Hallo, Dolly!“ – bavento arbeid he mit Heidi Mahler un Joachim Bliese tohoop.
Siet 2016 speelt he ok an dat Imperial Theater in Hamborg. 2022 weer he dor as „Dracula“ to sehn; 2024 speel he de Titelrull in „Jekyll un Hyde“ vun Robert Louis Stevenson, dat för den Theaterpries Hamborg – Rolf Mahres 2025 nomineert worrn is.
2024 sung he den Pang in „Prinzessin Turandot“ un den Monostatos in „Die kleine Zauberflöte“ an dat Hamborger Allee-Theater. Mit „Prinzessin Turandot“ hett dat Allee-Theater den Barbara-Kisseler-Pries för de Speeltiet 2023/24 wunnen.
Bi de Kinner-Oper „Geierwally (La Wally)“ weer he as Poppenspeler dorbi. Mit Rolf Zuckowski hett he sik de Revue „Deertenhoff“ utdacht; de schall Kinner mit Musik un de nedderdüütsche Spraak in Kontakt bringen.
2019 hett he för Gloria Studios den nedderdüütschen Kinofilm „Boot un Dood“ dreiht.
2022 speel he in den Kortfilm „Darf man das noch sagen?“, de för den Juliane-Bartel-Medienpries 2023 nomineert worrn is.
In de Corona-Tiet hett he de Web-Serie „Garderobengespräche“ maakt, den Kortfilm „Der Selbstmörder und das Nichts“ (na en Theaterstück vun Botho Strauß) un dat Online-Format „Platt2Go – Ohnsorgs lütte Platt-School“ för dat Ohnsorg-Theater. Sien Kinner-Filmprojekt „Möhlenredder-Show“ hett den Emmi-Pries för Plattdüütsch 2023 wunnen.
Bavento översett he Texten und Theaterstücken in’t Plattdüütsche, t.B. vun William Shakespare un Max Reinhardt, un he arbeidt as Spraak- un Schauspeelcoach mit Kinner un junge Lüüd tosamen. As Plattdüütsch-Coach arbeidt he för dat Ohnsorg-Theater un dat Lännerzentrum för Nedderdüütsch.
För dat Projekt „Bücherbrücken“ hett he Kinnerböker vun Ursel Scheffler översett.
För dat Projekt „Odyssee“, bi dat dree Hamborger Theater tohooparbeiden deen, hett he plattdüütschen Texten översett. Dat Projekt hett den Theaterpries Hamborg – Rolf Mahres 2025 (Sünnerpries) wunnen un ok den Barbara-Kisseler-Pries 2025.
Tosamen mit de Sopranistsche Lara-Sophie Scheffler un den Pianist Siegfried Gerlich is Christian Richard Bauer dat Klaus Groth Trio. Se richt klassische Leed-Konzerten ut un vertoont nedderdüütsche Lyrik oder anner Lyrik, de op Nedderdüütsch översett worrn is.
Mit sien Arbeitskolleeg Lara-Maria Wichels un ehr Mann Jendrik Wichels dreiht he siet Anfang 2026 de plattdüütsche Webserie Fiete un Erna.
Weblenken Offizielle Websiet
Enkelnawiesen
Kategorie:Mann Kategorie:Boren 1984 Kategorie:Börger von Düütschland