Reith is en Dörp in de Gemeen Brest in’n Landkreis Stood, Neddersassen. To Reith höört ok de Öörd Bredenbeek un Lüttjen Reith mit bi.

Geografie

De Oort liggt op de Stoder Geest. In’n Oosten von Reith liggt dat Naturschuulrebeed In’n Tadel. Dat Water ut dat Rebeed flütt över’n Reither Beek na de Bever hen af.

De Naveröörd sünd Aasp in’n Noorden, Brest in’n Noordoosten, Doosthoff in’n Oosten, Kokerbeek un Wohlers in’n Süüdoosten, Winnerswohl in’n Süden, Fehrenbrook in’n Süüdwesten, Farm in’n Westen un Baast in’n Noordwesten.

Historie

duum|Gedenksteen in Reith De Oort kummt 932 as Riade toeerst in de Oorkunnen vör.

In’n Eersten Weltkrieg sünd twölv Soldaten ut Reith fullen oder vermisst un in’n Tweten 28 Lüüd.Onlineprojekt Gefallenendenkmäler

Verwaltungsgeschicht

In de Franzosentied hett de Oort toeerst 1810 bet 1811 binnen dat Königriek Westfalen to de Mairie Aasp in’n Kanton Harsfeld höört un denn von 1811 bet 1814 to dat Franzöösche Kaiserriek ünner Napoleon un dor to de Mairie Harsfeld in’n Kanton Hornborg.

Vör 1885 weer dat Dörp in de Böörd Bargst binnen dat Amt Harsfeld. Na 1885 hett dat denn to’n Kreis Stood höört un von 1932 af an to’n hüdigen Landkreis Stood.

De Gemeen Reith weer von 1964 bet 1972 Deel von de Samtgemeen Bargst. 1972 is de Samtgemeen Bargst oplööst worrn un de Gemeen keem an de Samtgemeen Harsfeld.

Reith is an’n 1. Juli 1972 bi de Gemeenreform in Neddersassen mit de Gemeen Brest tohoopleggt worrn.

Inwahnertall

tohoop mit Bredenbeek un Lüttjen Reith

Religion

Reith is evangeelsch-luthersch präägt un höört to dat Kaspel von de Primus-Kark in Bargst.

För de Kathoolschen is de St.-Maria-Kark in Buxthu tostännig.

Kultur

duum|Dat Dörpgemeenschopshuus En Denkmaal för de Fullenen ut de twee Weltkrieg’ steiht bi’n Karkhoff.

Reith hett en Dörpgemeenschopshuus.

Museums

De Museumsschüün Reith, in de Stücken wiest warrt, de mit de Bueree in de Tied von dat 19. Johrhunnert bet so 1960 to doon hebbt, steiht in Bredenbeek.

Weertschop un Infrastruktur

duum|Sprüttenhuus von de Füürwehr Reith hett en egene Freewillige Füürwehr, de 1937 grünnt worrn is.

Verkehr

Reith liggt an de Kreisstraat 47, de in’n Noorden bi Bredenbeek an de K 48 (na Brest) un K 122 (na Farm) ranlöppt un in’n Süüdoosten na Kokerbeek un Wohlers geiht. Ans gifft dat noch en lüttjere Straat na Fehrenbrook.

De nächste Autobahn is de Autobahn 26 (Afsnidd Stood–Hamborg). De Opfohrt 5 Hornborg liggt so 22 Kilometer in’n Noordoosten von Reith an de K 36. De Opfohrt 47 Zittens op de Autobahn 1 (Afsnidd Hamborg–Bremen) liggt 23 Kilometer in’n Süüdoosten an de L 130.

De nächste Bahnhoff is de Bahnhoff Brest-Aasp an de Bahnlien Bremerhoben–Buxthu, de veer Kilometer in’n Noordoosten liggt.

Literatur

Wilhelm Thiele: Reith - Leben und Erleben auf der Stader Geest - Menschen Höfe und Häuser über die Jahrhunderte. Cardamina-Verlag, Plaidt 2012, ISBN 978-3-86424-070-6

Footnoten

Weblenken

Kategorie:Oort Kategorie:Landkreis Stood