Korlshöben () is en Dörp in de Gemeen Gnarrenborg in’n Landkreis Rodenborg, Neddersassen. To den Oort höört ok de Oortsdelen Korlshöbenerbarg un Korlshöbenermoor to.

Geografie

Korlshöben liggt op en Geestrügg, de in’t Düvelsmoor stött.

De Naveröörd sünd Langenhusen, Gnarrenborg un Barkhusen in’n Noorden, Augussendörp in’n Noordoosten, Glinst in’n Oosten, Noordsood in’n Süüdwesten un Findörp in’n Westen.

Historie

De Naam Korlshöben schall wohrschienlich op de Tied na de Sassenkriegen trügggahn, as Korl de Grote hier en Hoff anleggt hett.

Op’n Korlshöbenerbarg hett 1857 en Glasfabriek apenmaakt, de Korlshütt. Vondaag is dat de Brilliantleuchten AG.

Verwaltungsgeschicht

De Oort weer bet in dat 19. Johrhunnert opdeelt twüschen dat Amt Bremervöör un dat Gericht Hanst. 1791 hebbt negen Hüüs to dat Gericht Hanst höört un veer to dat Amt Bremervöör. As dat Gericht Hanst 1823 oplööst worrn is, is de Oort kumplett Deel von dat Amt Bremervöör worrn. To’n 1. August 1832 is dat Dörp denn aver in dat Amt Zeven wesselt un hett dor denn to de Böörd Rhaar tohöört.Christian Hermann Ebhardt: Gesetze, Verordnungen und Ausschreiben für das Königreich Hannover aus dem Zeitraume 1813 bis 1839. Jänecke, Hannover 1839, Band 2, Sied 65 Na 1885 weer dat in’n Kreis Zeven. 1932 is dat Deel von’n Kreis Bremervöör worrn un 1977 von’n Landkreis Rodenborg.

An’n 8. April 1974 is Korlshöben bi de Gemeenreform in Neddersassen mit de Gemeen Gnarrenborg tohoopleggt worrn.

Inwahnertall

Religion

Korlshöben is evangeelsch-luthersch präägt un höört to dat Kaspel Gnarrenborg. In dat 19. Johrhunnert hett de Oort noch to dat Kaspel von de Gallus-Kark in Rhaar höört.

För de Kathoolschen is de St.-Michaelskark in Bremervöör tostännig, de siet 1. September 2010 to de Karkengemeen Hillig Geist in Stood tohöört.

De Karkhoff von Korlshöben liggt an de Straat An de Kapell.

Oortsvörstänn

opstunns: Dieter Wellbrock

Wapen

Dat Wapen wiest op grönen Grund en sülvern Borg mit rode Däcker, de op en sülvern Schildfoot steiht. De Borg steiht för de Seeborg von de Familie von Issendörp, de hier fröher stahn hett.

Kultur

In de Ümgegend is Korlshöben vör allen ok bekannt dör sien Disko, den Dancing Club.

Verenen

De Schützenvereen Korshöbenermoor is 1951 grünnt worrn.

Weertschop un Infrastruktur duum|Wark von de Brilliant AG in Korlshöbenerbarg

Verkehr

Korlshöben liggt an de Landsstraat 122, de in’n Noorden na Gnarrenborg löppt un in’n Oosten na Glinst. Na Süden geiht de L 165 af, de na Worpsweed geiht.

De Oort hett ok en lütten Bahnhoff an de Moorexpress-Lien.

Bi Korlshöben gifft dat en lütten Flegerplatz mit en Lannbahn von 700 m, den Flegerplatz Korlshöben.

Scholen

Korlshöben hett en Kita un en Grundschool.

Literatur

Elfriede Bachmann, Johann Teetz: Karlshöfen, aus vergangenen Tagen. Volksbank Gnarrenborg, 1988 Johann Teetz: 150 Jahre Karlshöfenermoor: eine Ortschaft in Wort und Bild. 1998

Footnoten

Weblenken

Kategorie:Oort Kategorie:Landkreis Rodenborg (Wümm)