duum|Sprekens von Süden ut an de K 102 keken Sprekens () is en Dörp in de Gemeen Bremervöör, in’n Landkreis Rodenborg, Neddersassen. Binnen de Gemeen billt de Oort en egene polietsche Oortschop.

Geografie

De Oort liggt an dat linke Över von de Oost op de Geest an’n Rand von’t Moor.

De Naveröörd sünd Bremervöör mit Tingo in’n Noorden, Bevern in’n Oosten, Minst in’n Süüdoosten, Mintenborg in’n Süden, Foarndörp un Klenkendörp in’n Süüdwesten, Öös in’n Westen un Barchel un Örel in’n Noordwesten.

Historie

Dat Dörp kummt 1272 as Spreckensete toeerst in de Oorkunnen vör.

In’n Tweten Weltkrieg is in de Nacht op’n 29. Juli 1944 en brietsch/kanaadschen Fleger von’n Typ Avro Lancaster op’n Weg to en Bummenangreep op Berlin bi Sprekens afstört un in de Neegd von’n Karkhoff dalkamen. Söven Krulüüd sünd doodbleven, een hett överleevt un keem in düütsche Fungenschop. He kunn na’n Krieg na England trügg. Von de Doden kunn von twee nix mehr funnen warrn, de annern fiev sünd eerst op’n Karkhoff von Sprekens begraven worrn un later op en Karkhoff in Soltau ümbeddt worrn.

Verwaltungsgeschicht

In de Franzosentied von 1810 bet 1814 hett de Oort to de Mairie Bremervöör in’n Kanton Bremervöör höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort hett vör 1885 to dat Amt Bremervöör tohöört. Na 1885 weer dat in’n Kreis Bremervöör. 1932 is dat Deel von’n ne’en, grötteren Kreis Bremervöör worrn un 1977 von’n Landkreis Rodenborg.

1928 is de Gemeen Sprekens oplööst un Deel von de Gemeen Tingo worrn. To’n 1. Oktober 1949 is Sprekens denn aver wedder en egenstännige Gemeen worrn.Neues Archiv für Niedersachsen. Band 3, W. Dorn, 1949, Sied 871

Sprekens weer von’n 1. Januar 1971 bet 1974 Maat von de Samtgemeen Oostdaal un is an’n 1. März 1974 mit de Gemeenreform in Neddersassen denn an de Gemeen Bremervöör kamen. Sietdem billt de Oort en Oortschop mit egen Ortsvörsteiher.

Inwahnertall

Wapen

Dat Wapen wiest op roden Grund en sülvern Buurkrieger, de op sülvern Bodden vör en sülvern Palisaad steiht. He höllt en sülvern Schild mit gollen Schildsmuck, en gollen Sweerd an’n Lievreem un en gollen Lanz in de rechte Hand.

Politik

Sprekens hett binnen de Gemeen Bremervöör en egen Oortsvörsteiher. Dat is Werner Schröder.

Börgermeesters/Oortsvörsteihers: Naam Tied Reinhold Dederling –1858 Clemens Bargmann 1859–1865 Jürgen Buck 1865–1870 Cord Burfeindt 1871–1876 Clement Bargmann 1876–1883 Johann Holst 1883–1889 Hinrich Bargmann 1889–1895 Hinrich Burfeindt 1895–1896 Klaus Steffens 1896–1908 Claus Burfeindt 1908–1914 Christopher Stelling 1914–1920 Klaus Murk 1920–1928 Wilken Schröder 1928–1945 Emil Trobbens 1945–1946 Jürgen Steffens 1946 Johann Holst 1946–1947 Hinrich Bösch 1947–1949 Wilken Schröder 1949–1962 Hinrich Burfeindt 1962–1965 Klaus Schröder 1965–1991 Hinrich Steinberg 1991–2005 Werner Schröder 2005–

Religion

Sprekens is evangeelsch-luthersch präägt un höört to dat Kaspel von de Liborius-Kark in Bremervöör. Vörher hett de Oort bet 1925 to dat Kaspel von de Gangolf-Kark in Örel höört.

För de Kathoolschen is de St.-Michaelskark in Bremervöör tostännig, de siet 1. September 2010 to de Karkengemeen Hillig Geist in Stood tohöört.

Dat Dörp hett en egen Karkhoff an de Sprekenser Landstraat. Op’n Karkhoff steiht en Gedenktafel för de Doden ut’n afstört Fleger von 1944.

Kultur

Verenen

De Freewillige Füürwehr is 1936 grünnt worrn.

Infrastruktur

Verkehr

Sprekens liggt an de Kreisstraat 102, de in’n Noordoosten na Bremervöör un in’n Süüdwesten na Gnarrenborg löppt. En lüttjere Straat gifft dat ans noch na Minst.

De Oost-Hamm-Kanaal, de bi Sprekens an de Oost ranlöppt, hett för den Verkehr keen Bedüden mehr.

Literatur

Klaus Poppe: 725 Jahre Spreckens. 1997

Weblenken

Websteed to dat Dörp (hoochdüütsch)

Footnoten

Bremervörde und die Ortschaften, archiveert in dat Internet Archive Bremervörde und die Ortschaften

Kategorie:Oort Kategorie:Landkreis Rodenborg (Wümm)