Rüst () is en lütten Oort in de Gemeen Deinst, Samtgemeen Freenbeek, in’n Landkreis Stood, Neddersassen. De Oort liggt merrn in’n Rüster Forst.

Geografie

De Naveröörd sünd Gothenborg in’n Noorden, Dollern in’n Noordoosten, Hornborg in’n Oosten, Issendörp in’n Süden un Helmst in’n Westen.

Historie

Toeerst in de Oorkunnen dükert dat Dörp an’n 11. November 1105 as Ristede op, as Adela von Beichlingen Land bi Rüst an dat Klooster Katelnborg schenkt hett. Dat weer jümmer en lütten Oort, de man dree Hööv harr. 1632 hett Arzbischop Johann Friedrich den sweedschen Rieksraad Johan Adler Salvius Rüst schenkt, de dat to en Good utboot hett. Na 1652 hett de Familie Wynecken dat Good höört. 1840 hett de königliche Domänenkamer Hannover dat Good Rüst köfft un anfungen, dat Rebeed systemaatsch optoforsten.

1941 is in Rüst en Barackenlager för russ’sche Fungene boot worrn. Von de Fungenen sünd söven doodbleven, kort nadem se in Rüst ankamen sünd. Disse Lüüd liggt vondaag op’n Karkhoff in Helmst begraven. Dat Lager is na 1945 as Wahnlager för Verdrevene ut de Oostrebeden bruukt worrn.

Vondaag is in Rüst de Revierförsteree, de sik üm den Rüster Forst kümmert.

Verwaltungsgeschicht

In de Franzosentied von 1810 bet 1814 hett de Oort to de Mairie Hornborg in’n Kanton Hornborg höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

Vör 1885 weer de Oort in de Böörd Bargst binnen dat Amt Harsfeld. Na 1885 hett dat denn to’n Kreis Stood höört un von 1932 af an to’n hüdigen Landkreis Stood.

In de Midd von dat 19. Johrhunnert is de Oort Deel von de Gemeen Helmst worrn. De Gemeen Helmst hett von 1965 bet 1972 to de Samtgemeen Freenbeek tohöört. De is an’n 1. Juli 1972 oplööst worrn. In dat Johr is mit de Gemeenreform in Neddersassen de ne’e un gröttere Samtgemeen Freenbeek billt worrn, to de de Oort sietdem höört. Helmst is an dissen Dag mit de Gemeen Deinst tohoopleggt worrn.

Inwahnertall

Religion

Rüst is evangeelsch-luthersch präägt un hett bet 1959 to dat Kaspel von de Primus-Kark in Bargst höört. Nu höört dat to de Martin-Luther-Kark in Freenbeek.

För de Kathoolschen is de Hillig-Geist-Kark in Stood tostännig.

Weertschop un Infrastruktur

Verkehr

Rüst liggt an de Kreisstraat 44, de in’n Westen na Helmst an de Landsstraat 124 ran un in’n Oosten na Hornborg an de L 123 geiht. Annere Straten gifft dat nich.

Footnoten

Kategorie:Oort Kategorie:Landkreis Stood