De Zirienjen (Syringa vulgaris) sünd en Aard mank de Planten un höört to de Familie vun de Öölboomplanten (Oleaceae).
Wie de Zirienjen utseht De Plant wasst as en summergrönen Struuk oder as'n lüttjen Boom un warrt twee bit sess Meter hooch. De Twiege sünd rund un hefft en griese oder bruungröne Borke. An de Telgen un an'n Stamm sünd se langs inkarvt. De Blöer staht gegenanner un weert vun fief bit 12 cm lang. De Blattstengel is een bit dree cm lang. De Blöer seht ut, as'n Hart, man lang un loopt up'n Spitz to un hefft en glatten Rand. De Blöten rüükt duchtig un staht tohopen in en dichten Quast. De Farv kann blau, vigelett, wat root oder witt ween. Bleihen doot de Zirienjen vun April bit Mai. As Früchte wasst denn later tweeklappte, brune un holten Knotten. De Frucht warrt vun September af an riep.
Wo dat de Zirienjen geven deit De Zirienjen sünd in Süüdoosteuropa un Vörasien tohuse. De Aart warrt bi us faken in allerhand Gaarnsorten anplant un is up Felshänge un an Bahndämme faken to sehn. In lichte Hölter un in Buschwarks wasst de Zirienjen goot.
Geschicht In dat Johr 1560 is de Zirienje vun den kaiserlichen Gesandten Ogier Ghislain de Busbecq ut Konstantinopel na Wien henbröcht wurrn. Vun dat Enne vun dat 16. Johrhunnert af an is he toeerst in Frankriek un later in Buerngaarns in Middeleuropa to finnen. Man eerst vun de Midden vun dat 19. Johrhunnert, as de S. vulgaris-Hybride mit en Masse vun nee Farven un Farvmixturen tücht wurrn is, is de Plant allerwegens in Gaarns anplant wurrn.
Plattdüütsche Naams De Zirienjen sünd in de plattdüütschen Länner unner ganz verschedene Naams bekannt:
Zereenjen (Hermann Böning) Zerein Sirenenbusch Blausirien Floerkes Blaue Wiern Blauwiern Buschboom Eddelzierinjen Fleder Flerer Flöören Flöörn Frömm Fleder Kaneelbloom Kaneelboom Kaneelbusch Kaneelroos Kattensteert (Wohrschau: Duwock!) Naagelkes Nagelkes Nägelken Nagelblome Nagelkeboom Nageltakken Niägelken Niägelkes Niälken Päperstruuß Pastorenbloom Pingstbloom Pingstblome Pingsterblöme Pingsterboom Schireen Seriini Schireenje Siereenjen Sireen Siren Sirene Sirenen Sirenenbaum Sirinje Sirinjen Spaansche Fleder Spaansche Wiern Spaanschen Flerer Spaansche Ellhoorn Spaanschfleder Studentenbloom Sürenen Syrene Syringen Wiern Ziren Ziereenje Zireen Zirene Zirenenbäum Zirenge Zirengel Zirinje Zitrene
Kiek ok bi Projekt:Plantennaams up Platt
Literatur Fischer, M. A., Adler, W. & Oswald K.: Exkursionsflora für Österreich, Liechtenstein und Südtirol. Linz, 2005. ISBN 3-85474-140-5 Kremer, Strauchgehölze. Niedernhausen, 2002. ISBN 3-576-11478-5
Weblenken
Kategorie:Planten