Noardlike Lân- en Túnbou-organisaasje (Nederlânsk en offisjeel: Noordelijke Land- en Tuinbouworganisatie), yn 'e regel ôfkoarte ta NLTO, wie de namme fan trije opinoar folgjende Nederlânske regionale ûndernimmers- en wurkjouwersorganisaasjes foar de agraryske sektor en de túnbou yn Noard-Nederlân. De beide lêste organisaasjes wiene regionale belangeferienings dy't oansletten wiene by it lanlike LTO Nederlân. It haadkantoar fan alle trije organisaasjes wie fêstige yn Grins. __NOTOC__ Earste NLTO De earste NLTO ûnstie yn 1993, doe't de provinsjale ôfdielings yn Grinslân en Drinte fan it roomske Katolyk Nederlânsk Boere en Túnkers Bûn (KNBTB) en it liberale Keninklik Nederlânsk Lânbou-Komitee (KNLC) besleaten te fúzjearjen. De earste NLTO bestie los fan 'e ôfdielings Grinslân en Drinte fan it protestantske Kristlik Boere en Túnkers Bûn (CBTB), dy't sels trouwens yn 1993 ferraanden ta CBTB Noard-Nederlân.
Twadde NLTO De twadde NLTO hie syn woartels yn it gearfoegjen, yn 1995, fan 'e lanlike organisaasjes fan it KNBTB, it KNLC en it CBTB ta de nije koepelorganisaasje LTO Nederlân. Yn it ramt fan dy fúzje waarden datselde jiers de regionale ôfdielings yn Grinslân en Drinte fan it KNBTB en it KNLC (de earste NLTO) en it CBTB (CBTB Noard-Nederlân) ferraand ta in nije NLTO.
Trêde NLTO De trêde NLTO ûntstie yn 1999, doe't by in algemiene reorganisaasje fan LTO Nederlân de âldere Drintsk-Grinslânske NLTO fúzjearre mei de Frysk-Flevolânske Lân- en Túnbou-organisaasje (FLTO). De nije fúzje-organisaasje behold dêrnei de namme NLTO, mar besloech fan dat punt ôf ek de provinsjes Fryslân en Flevolân en hie yn totaal sa'n 15.000 leden. Yn 2005 gie dizze trêde NLTO, yn 'e mande mei de Westlike Lân- en Túnbou Organisaasje (WLTO) yn Noard- en Súd-Hollân en de Gewestlike Lân- en Túnbou-organsaasje (GLTO) yn Utert, Gelderlân en Oerisel, op yn it nije LTO Noard.
Kategory:Nederlânske lânbou-organisaasje Kategory:Nederlânske wurkjouwersorganisaasje Kategory:Nederlânske feriening Kategory:Skiednis fan Drinte Kategory:Skiednis fan Fryslân Kategory:Skiednis fan Flevolân Kategory:Skiednis fan Grinslân Kategory:Organisaasje oprjochte yn 1993 Kategory:Organisaasje opheft yn 1995 Kategory:Organisaasje oprjochte yn 1995 Kategory:Organisaasje opheft yn 1999 Kategory:Organisaasje oprjochte yn 1999 Kategory:Organisaasje opheft yn 2005