Willem fan Moraavje, 3e greve fan Sutherland (Ingelsk: William de Moravia; Sutherland (Skotlân), ±1250 – dêre, desimber 1330) wie in Midsiuwsk Skotsk ealman fan mingd Skotsk-Flaamsk etnysk komôf. Hy stiet ek wol bekend as Willem fan Sutherland of koartwei as Willem Sutherland. De oantsjutting 'fan Moraavje' ferwiisd nei (de latinisearre foarm) fan 'e Skotske krite Moray, en hat neat te krijen mei Moraavje yn East-Jeropa.
Libben Willem fan Moraavje waard omtrint 1250 berne as de âldste soan fan Willem fan Moraavje, 2e greve fan Sutherland, en in ûnbekende mem. It is net bekend wannear't er syn heit opfolge as greve fan Sutherland en haadman fan 'e Clan Sutherland.
Der is oer him net folle bekend, behalven dat er yn 1320 ien fan 'e 51 foaroansteande Skotske eallju wie dy't de Ferklearring fan Arbroath ûndertekenen, wêrmei't Skotlân nei de Earste Skotske Unôfhinklikheidsoarloch formeel syn selsstannigens weromnaam.
Willem fan Moraavje stoar yn desimber 1330, nei't it skynt yn 'e âlderdom fan likernôch 80 jier. Hy hie gjin soannen, en waard sadwaande opfolge troch syn tritich jier jongere broer Kenneth fan Moraavje.
Kategory:Skotske adel Kategory:Skotsk clanhaad Kategory:Clan Sutherland Kategory:Persoan yn de Skotske Unôfhinklikheidsoarloggen Kategory:Skotsk persoan fan Flaamsk komôf Kategory:Persoan berne yn 1250 Kategory:Persoan stoarn yn 1330