Eelke Jelles Eelkema (ek: Eelkama) (Ljouwert, 8 july 1788 - Ljouwert, 27 novimber 1839) wie in dôve Ljouwerter keunstskilder en tekener dy't benammen bekend is fanwege syn stillibbens.
Fanwegen syn dôvens, feroarsake troch in sykte doe't er sân jier wie, waard er fan syn alfde oant syn 19e jier oplaat oan it Dôfstommeynstitút yn Grins, dêr't er tekenjen learde fan G. de San en skilderles krige fan J.N. Schoonbeek.
Hoewol't Eelkema bekend stie as blommeskilder, hat hy ek in soad lânskippen skildere. Hy joech teken- en skilderles, ûnder oaren oan Cornelis Bernardus Buijs dy't op syn beurt wer les joech oan Jozef Israëls, lid fan de saneamde Haachske Skoalle.
Yn 1818 makke Eelkema in fuotreis fia Frankryk en oer de Alpen oant yn Turyn. Hy wurke ûnder oaren yn Amsterdam, Haarlim en Parys, dêr't er op kosten fan de kening Willem I, dy't ek wurk fan him kocht, hinne reizge. Op lettere leeftyd waard Eelkema blyn.
It Ryksmuseum Amsterdam hat sân wurken yn de kolleksje.
Galery
Bibliografy 15 oktober 1830 - Grondig onderricht in de teeken- en schilderkunst.
Ferwizing Ynformaasje oer Eelkema op de side fan it Ryksburo foar Keunsthistoaryske Dokumintaasje (RKD).
Kategory:Frysk keunstskilder Kategory:Frysk tekener Kategory:Persoan berne yn Ljouwert Kategory:Persoan stoarn yn Ljouwert Kategory:Persoan berne yn 1788 Kategory:Persoan stoarn yn 1839