Kirke (Grieks: Κίρκη) is in die Griekse mitologie ’n godin en towenares. https://www.britannica.com/topic/Circe-Greek-mythology Encyclopedia Britannica Sy is die dogter van die god Helios en óf die Okeanied Perse óf die godin Hekate. Kirke was bekend vir haar uitgebreide kennis van towerdrankies en kruie. Met behulp van haar kennis en ’n towerstaf kon sy haar vyande transformeer, of dié wat haar te na kom in diere verander.
Mitologie Die beste legende oor haar kom uit Homeros se Odussee. Toe Odusseus haar eiland, Aiaia, besoek op sy pad terug van die Trojaanse Oorlog, het sy die meeste van sy bemanningslede in varke verander. Hy het haar oortuig om hulle terug in mense te verander. Hy het ’n jaar lank by haar gewoon en seuns by haar gehad, onder wie Latinos en Telegonos. Haar vermoë om ander in diere te verander, word verder geïllustreer deur die verhaal van Pikos, ’n Italiaanse koning wat sy in ’n houtkapper verander omdat hy haar toenadering van die hand wys. In nog ’n verhaal word vertel hoe sy op die seegod Glaukos verlief raak, wat die nimf Skilla bo haar verkies het. Uit wraak vergiftig Kirke die water waarin Skilla bad wat Skilla in ’n vreeslike monster laat verander.
Kirke is ook beskou as die argetipiese vroulike jagter van mans, wat haar as ’n seksueel vrye vrou laat uitstaan het. Sy is as sodanig dikwels in kunswerke van die Renaissance tot die moderne tyd uitgebeeld.
In Westerse skilderye is ander verhale ook as inspirasie gebruik vir kunswerke oor haar, soos Ovidius se Metamorfoses. Die episodes oor Skilla en Pikos het ’n element van gewelddadige jaloesie by haar slegte eienskappe gevoeg en het haar ’n gehate én begeerlike wese gemaak.
Verwysings
Skakels
Kategorie:Karakters in die Griekse mitologie Kategorie:Vroue van die Trojaanse Oorlog