Die Golden Gate-hoogland- Nasionale Park is geleë in die Oos-Vrystaatse bergland; dit lê aan die voetheuwels van die Malutiberge. Die park is op 13 September 1963 geproklameerSANParke persvrystelling op 3 Julie 2013 en in November 2008 tot 34 000 ha vergroot deur die insluiting van die voormalige QwaQwa Nasionale Park.SANParks Annual Report 2009, section Golden Gate Highlands National Park (p.46) Die hoogte van die park wissel van 1 892 m tot 2 770 m bo seevlak. Aan die suide van park is die Monantsapas op die grens met Lesotho. Die Caledonrivier ontspring naby die pas.
Die park is vernoem na die goue kleure wat die sandsteen aanneem wanneer die son daarop skyn. Die bekendste van die sandsteenrotse is die Brandwagrots wat bo die park en hotel uittroon. Na die suide is die Ribbokkop 'n bekende baken wat deel vorm van 'n staproete al langs die Ribbokspruit wat per voet of viertrekmotor onderneem kan word.
Akkommodasie Akkommodasie in die park is by Glen Reenen- en die Brandwagruskampe beskikbaar. Karavaan- en tentstaanplekke met ablusie- en opwasgeriewe en 220V krag is by Glen Reenenkamp beskikbaar. 'n Kampwinkeltjie met die nodigste behoeftes en kurio's is langs ontvangs oorkant die pad, asook 'n vulstasie. Die hotel was voorheen deel van die Brandwagruskamp, maar ná sy onlangse opknapping, word dit afsonderlik deur SANParke as Golden Gate Hotel bedryf.
Die naaste dorp wes van Golden Gate-hoogland- Nasionale Park is Clarens, maar Phuthaditjhaba kan ook maklik via 'n goeie teerpad (R712) ooswaarts bereik word. Op hierdie hoofpad is ook die afdraai noord na die Highlands Mountain Retreat en suid by na die Basotho Cultural Village se grasdakrondawels wat as oornagakkommodasie deur SANParke bestuur word.
Waterskeiding Die oostelike gedeelte van die park vorm die waterskeiding tussen die oostelike en westelike gedeelte van Suid-Afrika. Reën wat oos van hierdie waterskeiding val, vloei uiteindelik in die Indiese Oseaan in, terwyl water aan die westelike kant in die Atlantiese Oseaan invloei.
Soogdiere Die grasveldhabitat van die hoogland huisves verskillende soogdierspesies,Soogdierspesies in Golden Gate insluitend:
Groot voëls Daar is ook 'n groot verskeidenheid voëls wat hier aangetref word: witkruisarend, jakkalsvoël, bloukraanvoël, sekretarisvoël en verskeie ander spesies. Die skaars lammergier met 'n vlerkspan van 3 m kom ook hier voor.
Vislewe Karp kom voor in die Golden Gatedam en die reënboogforel in die rivier onder die dam en ook in die Ribbokspruit. Die kleinbek-geelvis is voorheen in die Klein-Caledonrivier opgemerk, maar is vir 'n geruime tyd nog nie weer aangeteken nie, terwyl die dikkop-ghieliemientjie wydverspreid in die park voorkom.
Galery
Lees ook Katedraalgrot
Verwysings
Bronne B.P.J. Erasmus: Op Pad in Suid-Afrika. 1995.
Kategorie:Nasionale parke van Suid-Afrika Kategorie:Natuurreservate in Vrystaat