Sex Education is 'n Britse tienersekskomedie vir televisie wat deur Laurie Nunn vir Netflix geskep is. Dit gaan oor die lewe van die tieners en volwassenes op die fiktiewe dorp Moordale en hulle verskeie persoonlike dilemmas, wat dikwels met seksuele intimiteit te doen het. Akteurs sluit in Asa Butterfield, Gillian Anderson, Ncuti Gatwa, Emma Mackey, Connor Swindells, Kedar Williams-Stirling, Alistair Petrie, Mimi Keene en Aimee Lou Wood.

Die eerste reeks is op 11 Januarie 2019 op Netflix uitgereik. Die tweede, derde en vierde reeks het onderskeidelik in Januarie 2020, September 2021 en September 2023 gevolg. Sex Education het lof gekry vir sy toneelspel, skryfwerk, regie, produksiewaarde en volwasse behandeling van sy temas.

Die program was 'n sukses onder kykers, met meer as 40 miljoen mense wat die eerste reeks ná sy debuut gekyk het. Wood het die Bafta vir die beste vroulike toneelspel in 'n komedie gewen vir haar rol in die tweede reeks, en die derde reeks het die Emmy vir beste komediereeks gewen.

Opsomming Sex Education gaan hoofsaaklik oor die lewe van Otis Milburn, 'n leerling aan die Sekondêre Skool Moordale. Otis begin die reeks met teenstrydige gevoelens oor seks: deels omdat sy ma, Jean Milburn, 'n seksterapeut is wat gereeld affairs met mans het, maar nie 'n romantiewe verhouding handhaaf nie.

Ander leerlinge aan die skool sluit in Eric Effiong, Otis se beste vriend en die gay seun van Ghanees-Nigeriese immigrante; Maeve Wiley, 'n intelligente en rebelse tiener met 'n troebel gesinsverlede; Adam Groff, die skoolhoof, Michael Groff, se seun wat 'n boelie word omdat hy homself minag; Jackson Marchetti, die hoofseun, wat sukkel om aan die hoë standaarde te voldoen wat vir hom gestel word; Ruby Matthews, Anwar Bakshi en Olivia Hanan, lede van 'n gewilde kliek bekend as "the Untouchables"; Aimee Gibbs, 'n Untouchable wat Maeve in die geheim bevriend; en Lily Iglehart, 'n skrywer van buiteaardse erotika wat vasbeslote is om haar maagdelikheid te verloor.

Nuwe leerlinge wat gou by die skool aansluit, is Ola Nyman, wie se wewenaar-pa, Jakob Nyman, 'n verhouding met Jean begin. Otis se pa, die rokjagter Remi Milburn, en Maeve se ma, die dwelmverslaafde Erin Wiley, keer later na Moordale terug om weer met hulle kinders in verbinding te tree.

Episodes       Reeks   Episodes  Uitgereik 1 8 2 8 3 8 4 8

Storielyn

In die eerste reeks begin Otis en Maeve 'n seksterapiekliniek om die leerlinge van die skool met hulle seksprobleme te help. Hulle besigheid is 'n sukses, maar probleme steek kop uit toe Otis aangetrokke begin voel tot Maeve.

In die tweede reeks kom nuwe leerlinge by Moordale aan, insluitende Ola, wat Otis se eerste meisie word. Maeve sukkel om haar gevoelens vir Otis uit te druk. Eric help sy voormalige boelie, Adam, om sy seksualiteit te aanvaar. Jean word die skool se seksterapeut toe 'n uitbraak van chlamydia wys die leerlinge het beter seksvoorligting nodig.

In die derde reeks begin 'n nuwe skooljaar terwyl Otis ongereeld seks met Ruby het terwyl Eric en Adam amptelik 'n paartjie word. Maeve werk saam met die Engelsonderwyseres, Emily Sands, om aansoek te doen vir 'n uitruilprogram in Amerika. Intussen verwag Jean 'n baba in die nabye toekoms en die nuwe skoolhoof, Hope Haddon, se planne om die skool te vernuwe veroorsaak konflik met die leerlinge.

In die vierde reeks pas die leerlinge aan by die nuwe termyn aan Cavendish Sixth Form College nadat die Sekondêre Skool Moordale toegemaak is. Otis ding met 'n ander seksterapeut op die skoolterrein mee en Maeve begin haar studies aan die prestigeryke Universiteit Wallace in Amerika.

Hoofakteurs

Asa Butterfield as Otis Milburn, 'n sosiaal ongemaklike tiener wat raad aan sy skoolmaats gee. Gillian Anderson as Jean Milburn, Otis se ma en 'n bekende seksterapeut. Ncuti Gatwa as Eric Effiong, Otis se openlike gay beste vriend wat uit 'n godsdienstige Ghanees-Nigeriese gesin kom. Emma Mackey as Maeve Wiley, 'n intelligente maar gekwelde tiener wat die seksterapiekliniek saam met Lotis bedryf. Connor Swindells as Adam Groff, die skoolhoof se seun en Eric se boelie, wat sy liefdesbelangstelling word. Kedar Williams-Stirling as Jackson Marchetti, die hoofseun en 'n swemkampioen. Alistair Petrie as Michael Groff, die skoolhoof en Adam se streng pa. Mimi Keene as Ruby Matthews, 'n gewilde meisie en die leier van die Untouchables-kliek. Aimee Lou Wood as Aimee Gibbs, 'n voormalige lid van die Untouchables wat Maeve bevriend. Chaneil Kular as Anwar Bakshi (reeks 1-3), 'n lid van die Untouchables. Simone Ashley as Olivia Hanan (reeks 1-3), 'n lid van die Untouchables. Tanya Reynolds as Lily Iglehart (reeks 1-3), 'n meisie wat buiteaardse erotika skryf. Patricia Allison as Ola Nyman (reeks 1-3), 'n panseksuele meisie wat by die skool inskryf. Mikael Persbrandt as Jakob Nyman (reeks 1-3), Ola se pa en 'n Sweedse wewenaar wat 'n verhouding met Jean aanknoop. Anne-Marie Duff as Erin Wiley (reeks 2-3), 'n dwelmslaaf en afwesige ma vir Maeve, Sean en Elsie. Jemima Kirke as Hope Haddon (reeks 3), die nuwe skoolhoof wat Michael Groff vervang. James Purefoy as Remi Milburn (reeks 2), Otis se pa en Jean se eksman, 'n terapeut en seksslaaf wat in Amerika woon. Rakhee Thakrar as Emily Sands (reeks 3), 'n Engelsonderwyseres by die skool.

Omgewing en gevoel Die omgewing waarin Sex Education afspeel, lyk soos die moderne Brittanje, op die fiktiewe dorp Moordale, met verskeie elemente wat die minireeks in 'n onsekere tyd en op 'n onsekere plek plaas. Moderne tegnologie soos slimfone bestaan, maar daar is baie min motors uit die tyd ná die 1990's; die meeste motors kom uit die 1970's tot 1990's. Die televisiestelle en huishoudelike toestelle kom ook uit 'n ouer tydperk. Die dekor van die Groffs se huis herinner aan die 1970's, terwyl Maeve se woonwa tipies van die 1990's-2000's is en die Milburns se huis moderne dekor bevat met 'n yskas in 'n "Amerikaanse styl". Die Sekondêre Skool Moordale bevat sekere elemente van hoërskole in Brittanje, maar het ook 'n soort Amerikaanse styl.

Volgens Laurie Nunn is die minireeks se gevoel met opset gekies as 'n huldeblyk aan die rolprente uit die 1980's van die rolprentvervaardiger John Hughes en aan die tienerkomedies uit dié tyd. Die minireeks bevat baie elemente, motiewe en ontwerpe wat in dié prente voorkom, en die Amerikaanse tienerkultuur oor die algemeen, soos tieners wat om sluitkaste rondhang, geen skooluniforms en studente met letterbaadjies.

Ontvangs Op 17 Januarie 2019 het Netflix aangekondig die reeks is binne 'n maand ná sy uitreiking deur meer as 40 miljoen kykers gestroom. Tussen 21 September en 24 Oktober is dit meer as 447 750 000 uur lank gekyk.

Reeks 1 Volgens die webtuiste Rotten Tomatoes was 91% van 80 resensies van die eerste reeks positief, met 'n gemiddelde punt van 8,1/10. Die webtuiste se konsensus lui: "Sex Education is ontugtig en innig, en verbasend slim. Dit is 'n gebaljaar deur 'n groep tieners wie se seksuele teenspoed so sorgsaam weergegee word dat volwassenes 'n ding of twee daaruit kan leer." Metacritic het 79 uit 100 daaraan gegee, gebaseer op 19 resensies, wat dui op "algemeen gunstige resensies".

Reeks 2 Die tweede reeks het op Rotten Tomatoes 'n goedkeuringsyfer van 98% gekry, met 'n gemiddelde punt van 8,30/10, gebaseer op 57 resensies. Op Metacritic het die reeks 83 uit 100 gekry, gebaseer op 11 resensies.

Reeks 3 Die derde reeks het op Rotten Tomatoes 'n goedkeuringsyfer van 98% gehad, met 'n gemiddelde punt van 8,50/10, gebaseer op 42 resensies. Dit word genoem 'n "meestersklas in uiters eerlike en innige komedie". Op Metacritic het die reeks 'n punt van 83 uit 100 gekry, gebaseer op 11 resensies. Dié reeks het in 2022 die Emmy vir beste komediereeks gewen.

Reeks 4 Op Rotten Tomatoes het die vierde reeks 'n goedkeuringsyfer van 91% geky, gebaseer op 44 resensies. Op Metacritic het die reeks 70 uit 100 gekry, gebaseer op 17 resensies.

Verwysings

Skakels

Kategorie:Britse televisiereekse